KUCHING: Menteri Utiliti Enggau Telekomunikasyen Datuk Julaihi Narawi minta semua pemekal servis meranakka puku di menua pesisir ungkup nyendiaka servis internet.

Ku iya, pemekal servis enda ibuh irau datai ke menua pesisir laban perintah udah nyendiaka mayuh tiang pemanchar dikena ngemuntangka pengawa sida.

“Naka tu, perati enggau fokus sida semina di mengeri, nya alai aku madahka nadai salah sida meranakka puku di menua pesisir.

“Nya kebuah, bala bakih aku di dalam opis menteri benung bebendar ngiga chara awakka peranak di serata menua Sarawak ulih nerima bungkur internet nyadi nyata,” ku iya.

Iya bejaku munyi nya rambau Program Licha Al-Quran beserimbai Pengawa Tilawah enggau Menghafaz Al-Quran ti ke-61 Renggat Nengeri Sarawak di Kompleks Islam Sarawak ditu, kemari.

Julaihi madahka, apin lama iya udah ngatur siti aum khas enggau semua ejensi bekaul sereta pemekal servis baka Celcom, Digi enggau Umobile bagi ngiga chara nyendiaka servis internet, Wifi enggau ke bukai ngagai serata Sarawak.

“Kebuah pia, laban kitai merambu Sarawak deka disikap enggau bungkur internet penuh manggai taun 2025,” ku iya.

Tandu iya, nangah pengawa nya, sida ngarapka pengawa belajar atas tali arus enggau program ti dipejalaika Opis Pengarap Islam Sarawak (Jais) mega ulih diatur ba menua pesisir.

Nangkan nya, Julaihi mega bisi madahka iya ba renggat opis menteri terus komited nentuka bekal ai beresi enggau kuasa karan dibungkur ngagai serata Sarawak.