KUCHING: Perintah Sarawak mantai perambu ngena teknologi tinggi enggau manah ke rampa menua ngagai sebuah serikat antarabansa Latrobe Magnesium (ASX: LMG) ti dipelaba ngemansang loji magnesium ba Taman Perindustrian Samalaju, Bintulu.

Sapit Premier Sarawak, Datuk Amar Awang Tengah Ali Hasan ngenukuka pekara nya pengudah betemu enggau raban serikat nya.

“Ya, sida bisi datai betemu enggau aku lalu bisi niat laban meda peluang kuasa gadung menua kitai.

“Nya alai, kami endang ngelalu pemeranak puku tu lalu netap loji tu meseti ngena teknologi tinggi enggau manah ke rampa menua,” ku iya.

Awang Tengah bejaku munyi nya lebuh ditanya pemberita rambau Pengerami Ngelalu Pengabang Hari Raya Aidilfitri Premier Sarawak di Palan Aum Borneo (BCCK) kena 22 April tu tadi.

Awang Tengah ti mega Menteri Dagang Antarabansa enggau Pengawa Beranakka Puku madah, serikat tu entara pemeranak puku antarabansa ti keran deka beranakka puku ba Sarawak.

Dulu ari nya, Latrobe Magnesium (ASX: LMG) diripot udah milih Sarawak numbuhka loji magnesium 100,000 tan setaun. Kaunsil direktor serikat nya udah ngemendar perambu Taman Perindustrian Samalaju ba Sarawak nyadi taba kilang pengudah infrastruktur dia dipansik baru.