Sarawak enam hari bejurut nadai kes positif Covid-19

KUCHING: Sarawak enam hari bejurut nadai ngerikod kes baru positif Covid-19, pia ku Komiti Penyangga Penusah Ngenyit Nengeri (JPBN).

Ku JPBN, tu ngujungka kes positif Covid-19 ba Sarawak mengkang 678 kes.

“Taja pia, bisi 10 kluster agi ngerekai ba Sarawak.

“10 kluster tu iya nya kluster Syarikat kejuruteraan, kluster Mambong, kluster Pusat Perubatan, kluster Jupiter, kluster Pasar Stutong, kluster jeti Kuching, kluster Sentosa, kluster PUI Melbourne, klusteri syarikat pembinaan Kuching sereta kluster Pasar Satok,” ku penerang nya.

Nambahka nya, bisi empat kes baru udah suman enggau dikemendar pansut ari Sepital Besai Sarawak (SGH), sehari tu.

“Tu ngujungka bisi 621 iku tauka 91.59 peratus kes positif Covid-19 ti udah suman enggau dikemendar pansut ari sepital.

“Bisi 38 iku agi diperubat ba wad isolasyen enggau kes pemati mengkang 19 iku tauka 2.80 peratus.

Kemari, bisi 33 kes Pesakit Dipelaba Kena Rampit (PUI) baru diripotka enggau enam kes agi nganti pemutus makmal.

Suara Sarawak