Sarawak enda ibuh kiruh isu politik luar – Fadillah

KUCHING: Sarawak semina nyaga Sarawak, ku Datuk Seri Fadillah Yusof lebuh dipinta meri penemu pasal isu politik ti nyadi ba luar menua tu.

Kaban Parlimen Petra Jaya nya madahka, Sarawak enda ibuh kiruhka isu politik ti nyadi ba Semenanjung enggau Sabah.

Iya ditanya bekaul enggau isu Dun Sabah ti dipadamka Kepala Menteri Sabah Datuk Seri Mohd Shafie Apdal sereta udah diaku Tuai Pemegai Nengeri Sabah Tun Juhar Mahiruddin kenaka 30 Julai tu tadi.

Kenu ku iya, Sabah ungkup Sabah enggau Sarawak mega ungkup Sarawak iya nya pekara ti pemadu beguna rayat menua tu ulih nyaga Sarawak empu.

“Anang nitihka nama pekara ti nyadi di Sabah enggau Semenanjung, kitai di Sarawak mesti besatu ati,” ku iya.

Iya bejaku munyi nya lebuh ditanya pemberita pengudah Program Ibadah Korban Aidiladha Raban Nembiak N8 Satok di Jalai Abang Ateh, Satok pagi tadi.

Iya ti mega Mandal Presiden Kanan PBB ngelalau rayat Sarawak ngambika terus ngingatka pesan niang Kepala Menteri Pehin Sri Adenan Satem enggau Kepala Menteri diatu Datuk Patinggi Abang Johari Tun Openg awakka ulih beserakup nyaga nengeri tu.

Sama bisi datai Chairman PBB Pampang Satok Datuk Ibrahim Baki, Ketuai Nembiak PBB Satok Kaunselor Dzamaluddin Zainudin, Sekeratri PBB Satok Abdul Samat Gany, Mandal Ketuai Pati PBB Satok Helmi Othman sereta bala bukai.