Sarawak enda setuju perambu nutup klinik

KUCHING: Sarawak sigi enda nitihka perambu Opis Menteri Pengerai (MoH) nutup klinik pengerai ba kandang menua pesisir.

Menteri Kunsil Kandang Menua enggau Berumah Datuk Dr Sim Kui Huan madah perambu nya ukai pekara ke manah.

Dalam timpuh berapa hari ke udah, iya (Dr Sim) bisi betemu enggau Ketuai Sekretari MoH, alai perambu nya dikenatai.

“Sida merambu ngasuh kitai muka siti klinik aja di kandang menua pesisir, semua klinik ke besemak digempung ba siti alai.

“Tu ukai siti pemutus ke betul lalu perambu nutup sekeda klinik ukai chara ke patut dititih.

TEPA…Dr Sim (kanan) nerima tepa ari Chairman Makai Lemai MMA Ke -47 Dr Morni Abu Samat rambau pengawa.

“Kitai meseti mansik isu tu, engka klinik ulih dibuka ba maya ke ditetap tauka kitai nyendia servis pengerai mindah kin kitu,’ku iya.

Dr Sim mansutka jaku nya ngagai pemberita pengudah ngulu Makai lemai Genap 47 Tahun Gerempung Berubat Malaysia (MMA) pampang Sarawak di siti hotel ditu, malam ensanus.

Iya mega madah diak kuasa otonomi ba sentang pengawa nyendia servis pengerai meseti dibri ngagai Sarawak.

Nengah kuasa nya ku iya, Sarawak ulih nusun program pengerai di negeri tu kelimpah nentuka pemayuh tumbuh raban sida ke landik ba pengawa pengerai.

Ngakun penyampau tubuh orang ke nguwan menua pesisir majak kurang, Dr Sim madah pemindah peranak rumah panjai ke kandang mengeri enda ulih ditagang.

Ketegal nya, statistik madangka sekeda klinik pengerai di menua pesisir semina ngerikut 5 nyentuk ngagai 10 iku aja orang datai berubat ninting hari.

“Aku nemu kitai diatu bisi tujuh kategori klinik, di Sarawak kitai begunaka kategori ke lapan.

“Klinik kategori lapan tu tau dibuka miakka pagi Hari Satu, Tiga enggau Lima, lalu ba Hari Satu, Dua enggau Empat kitai ulih nyendia servis pengerai mindah kin kitu,”ku Dr Sim.

Ngenang sentang Mengeri Kuching, iya madah pengawa nirika spital besai udah enda engkeman agi di Kuching.

Ku iya, Kuching diatu begunaka spital ‘pakar’ baka ke sepital jantung, sepital nembiak enggau orang indu.

Suara Sarawak