Sarawak First – Jaku ngasi GPS napi PRN

SPAOH: Pemar politik ba Pengawa Bepilih Nengeri (PRN) ti deka datai disadang ngasi agi enggau rambai jaku ‘Sarawak First’ lalu ukai nya politik pemansang ti dibai sebedau tu.

Sapit Kepala Menteri Datuk Amar Douglas Uggah Embas madah, kenyau ari kuasa bekalih di renggat Perintah Besai lebih setaun ke udah, mayuh berubah ba gaya pejalai politik kemaya hari.

“Pemar politik mega udah berubah lalu gaya langkar politik pemansang ti dikemeran dikena nginti undi rayat dipelaba enda ngasi agi.

“Kebuah pia laban sida ke nyadi Perintah Besai dikemudi Pakatan Harapan (PH) mega bisi meri pemansang.

“Nya kebuah rambai jaku ‘Sarawak First’ ke disada Gabungan Parti Sarawak (GPS) nyadika pengering ba pengawa ngetanka hak Sarawak enggau isi iya ari majak lenyau tauka diambi orang luar,” ku iya.

SUKUNG TEGUT… Uggah (duduk rintai mua, tujuh kiba) disempulang Lawson (enam kiba) sereta bala bukai begambar bebala mayuh kelai sukung ngagai pengawa ditegika GPS.

Iya mansutka jaku nya lebuh ngulu program randau begulai enggau pemesai renggat baruh Dun Bukit Saban diatur di Rumah Francis Nyanggau Penom, kemari.

Ku iya, semua rayat nengeri tu patut sama bisi pengeran negi enggau nyukung pengawa mulaika semua hak ke lenyau ari Putrajaya.

“Kepala Menteri Datuk Patinggi Abang Johari Tun Openg mega bisi strategi enggau chara iya empu.

“Nya alai aku ke nyadi pengemudi Perintah Sarawak (GPS) ngaga pemutus enda nyemilik PH tang bisi kaul ti meruan, pekara ke betul enggau meri pemaik ngagai Sarawak endang disukung lalu pekara ke bukai deka ditulak.

“Taja enda seperabung enggau Putrajaya tang kitai mega deka naka ulih ngemai pemansang ungkup nengeri enggau rayat ditu. Kitai ngandalka diri deka seruran maju,” ku iya madah nyemetak.

TEGAPKA GPS … Uggah nyuaka tambai GPS ngagai siku ari ketuai renggat baruh nyerumba atur program sehari nya.

Berindik ari nya iya ngansak rayat patut meretika gaya pejalai politik kemaya hari lalu enda mudah alah penemu ari parti luar.

“Pengawa ditegika kitai diatu ungkup uchu ichit kitai dudi hari. Anang nejuka Sarawak dipegai parti luar.

“Perintah Sarawak netapka empat pekara di baruh Sempekat Malaysia 1963 (MA63) ti enda diterimai dibai dalam aum enggau Perintah Besai.

“Empat pekara tu ngaul kuasa autonomi imigresyen, hak neritka kuasa undang-undang nengeri nitihka Konstitusyen Perintah Besai, nyaga garis entara menua enggau kandang tasik, dalam tanah enggau pemansut iya di garis entara menua,” ku iya nerang silik.

Uggah mega dekaka rayat bisi penemu nyenggala pasal sapa bagi nyadi ulun lalu sapa bagi ke mayuh pelitik.

“Sebedau PRU suba, Chairman PH Sarawak Chong Chieng Jen kala besemaya enti sida menang di Putrajaya, 20 peratus royalti minyak enggau gis deka diberi ngagai Sarawak, pia mega asil chukai 5 peratus deka dipulai.

“Tang pengudah setaun lebih megai perintah, dini semaya nya?”

“Suba, sida mega kala ngumbai aku tu ulun Malaya, diatu baka ni? Sida temati kutu, enda tepansutka jaku,” ku iya nandu.

Beserimbai enggau program nya, Adun Bukit Saban mega bisi nyuaka geran MRP penyampau RM593,600 ngagai 95 JKKK kelimpah RM355,000 ngagai Biro Indu.

Sama datai MP Betong Datuk Robert Lawson Chuat enggau Sekretari Politik Kepala Menteri Dr. Richard Rapu.

TIBAR PERANSANG… Uggah bejaku ba mua mayuh rambau Program Randau Begulai Enggau Pemesai Renggat Baruh Dun Bukit Saban.

Suara Sarawak