Sarawak fokus ngemansang infrastruktur enggau telekomunikasyen

KUALA LUMPUR: Bekau ari agih bajet 2020, Perintah Sarawak deka beratka pelajar enggau pengerai kelimpah meri perati ngagai pemansang infrastruktur enggau telekomunikasyen.

Ketuai Whip Gempung Parti Sarawak (GPS), Dato’ Sri Fadillah Yusof madahka pekara tu pengudah berundingka penemu ari Kepala Menteri Sarawak enggau juluk rayat Sarawak diatu.

“Kelimpah ari infrastruktur baka api, ai enggau kuasa karan sereta penyambung komunikasyen, Perintah Sarawak mega meri perati ngagai bidang pelajar nyengkaum begunan sekula, buding, perengkaguan pengajar enggau pekara bukai.

“Pekara tu berindik ari atur Perintah Besai ba bidang pelajar di Sarawak pengudah Perintah Sarawak mayar panjar RM350 juta baka dipinta Perintah Besai apin lama,” ku Fadillah.

Iya ngelansa juluk Perintah Sarawak dalam Bajet 2020 dipejuraika Lim Guan Eng ba Dewan Rayat.

Fadillah mega ngelansa pasal guna bidang perubat ba Sarawak lalu Perintah Besai patut meri perati pekara nya dalam Bajet 2020.

“Enti dibanding Sarawak enggau Semenanjung, ba Semenanjung bisi doctor pakar ba genap nengeri tauka pelilih menua sida.

“Nya kebuah, nyema bisi penusah bebadi ba Plus Highway, sida muntang nganjung pesakit ngagai sepital ke semak.

“Tang nengeri Sarawak pemesai Semenanjung semina bisi lutur pakar ba kuching lalu pekara tu meri pemar lebuh nganjung pesakit laban kelalu jauh enggau kurang peluang ngubat pesakit nya,” ku iya nerang.

Nya alai, Perintah Besai patut meri kuasa lebih ngagai kitai nyengkaum meri agih belanja ti chukup ba bidang pengerai ngambi ulih mutarka penanggul tu.

Nambahka nya, Fadillah deka beratika Bajet 2020 ungkup nengeri Sarawak entara agih belanja nyin kemari di baruh perintah dulu suba enggau Perintah Besai dipegai Pakatan Harapan (PH) diatu.

“Ambika banding, Menteri Kereja Raya meri berati ngagai Pejalai Projek Jalai Baram ngagai Lawan enggau ngelaung Renggat Kedua Pan Bornoe ti nyambung entara Limbang, Lawas enggau Brunei,” ku iya nyemetak madah.

“Projek Jalai Baram ngagai Lawas nya deka begunaka ungkus penyampau
RM4 billion lalu projek nya deka ngeruga program tauka agih belanja pemansang ke bukai ba Sarawak?,” ku Fadillah nanya.

Kelimpah ari nya, Fadillah ngarapka kaul kerejasama entara Perintah Besai enggau Perintah Sarawak ulih ditanggam rat ungkup rayat enggau menua tu.