KUCHING: Sarawak enggau Indonesia benung nyerungkai peluang nempa kerejasama terus dikena nagang pengerekai penyakit bekaul jelu.
Nya nyengkaum penyakit Kaki enggau Mulut (FMD), Renga Jani Afrika (ASF), renga burung tauka Avian Influenza (AI) sereta rabies.
Penemuai gawa Opis Menteri Industri Pemakai, Komoditi enggau Pemansang Wilayah Sarawak ngagai Indonesia ti betuai ke menteri nya empu, Datuk Seri Stephen Rundi Utom kena 3 nyentuk 9 Mei tu tadi dikena negapka agi kerejasama nya.
Penerang ari opis menteri nya madah, inisiatif nya dipejalai laban penyakit rabies, AI enggau ASF majak ngerekai ba Sarawak enggau ba sekeda wilayah Kalimantan sereta Indonesia.
“Penemuai gawa tu meri peluang ngagai kededua raban tu bekunsi penemu bekaul pengawa nagang pengerekai penyakit jelu tupi tu.
“Pia mega, kerejasama terus bekaul pengawa ngatur biosekuriti enggau pemansang sektor betupi entara Sarawak enggau Indonesia bela dikerandau.
“Tu nyengkaum pengawa mindahka teknologi betupi enggau pekara dikena ngelancharka dagang kemaya hari ti nerima empas ari pekara tu,” ku penerang nya kemari.
Iya madah, Perintah Indonesia udah mantaika penyikap sida nerus kerejasama ba pemansang sektor betanam betupi kelebih agi ba sektor mit betupi dikena mantu Sarawak nyapai tikas pengelikun pemakai ti manah agi.
