KUCHING: Projek Hidroelektrik Baleh (HEP), projek hidrokuasa pemadu besai Sarawak Energy Bhd naka tu, ngundan 1,285 MW udah ngerikod pemujur ke chukup besai iya nya nembuka dua jalai lawit baruh tanah, neresa sungai enggau pengawa ngempang ba bulan Oktober tu tadi.
Pengawa miring udah dikemujur laban nitihka peminta mensia mayuh ba menua nya kelai pemujur nembuka pakej projek nya.
Ba penerang media kemari, Sarawak Energy madah pengawa nembuka jalai lawit baruh tanah, neresa sungai enggau ngempang nya sebagi ari enam pakej kereja projek Baleh.
Menteri Utiliti Sarawak Datuk Seri Dr Stephen Rundi Utom meri terima kasih ngagai Sarawak Energy enggau meri puji ngagai tim projek Baleh sereta kunteriktor bekau ari pengeransing nembuka projek nya taja napi mayuh pemar sereta pangka pengerekai pandemik COVID-19 jam ke diatu.
“HEP Baleh endang siti ari projek besai projek infrastruktur pemadu besai perintah nengeri Sarawak lalu projek hidrokuasa pemadu besai Sarawak Energy naka tu.
“Projek tu beguna amat dikena ngulihka beka karan ke diguna ungkup pemansang Sarawak jemah.
“Nya mega deka nyukung juluk nengeri tu nyapai status nengeri besai penatai pemisi manggai taun 2030 sereta nyendiaka hidrokuasa baru ungkup pemansang.
“Projek tu dipelaba begunaka servis urung 3,000 iku orang lalu aku ngarap enggau ngemataka Sarawak Energy nyapai tagit pemujur jemah nengah sukung ari perintah,” ku Rundi.
Berebak enggau nya, Ketuai Pemesai Eksekutif Gerup Sarawak Energy Datuk Sharbini Suhaili madah HEP Baleh deka mantu ngetanka status serikat nyadi pengeluar karan ke pemadu besai ba Malaysia.
“Projek tu mungkur mayuh piak, nya alai dikena meri pekara nya adil sukung ari perintah enggau mensia mayuh beguna amay awakka kami ulih nangkup tagit nembika jalai lawit baruh tanah ti neresa sungai,” ku iya seraya madah pekara nya beguna amat awakka HEP Baleh tu ulih dibuka nitihka tagit manggai taun 2026.
Iya madah, lebuh udah dibuka penuh ba taun 2026 ila, HEP Baleh deka masuk loji hidrokuasa Sarawak nyengkaum Batang Ai, Murum enggau Bakun dikena nyukung juluk Sarawak nyadi pengeluar besai kuasa karan sereta dipenggi kaban serantau. -Bernama
