KUCHING: Sarawak menggi pangku pengawa besai ba rampa fiskal menua ti nyendiaka pemansut ngagai ekonomi Malaysia, ku Sapit Menteri Wang I, Datuk Seri Ahmad Maslan.
Iya madah, mayuh pengelebih ekonomi nengeri tu ti nyadi pemansut ekonomi nya nyengkaum pengeraja asal, pemansang infrastruktur sereta pemansang pengawa industri enggau kilang.
Kelimpah ari nya ku iya, sektor betanam betupi enggau dagang asil betanam betupi, pengulih dagang temuai enggau pemansang Dagang Mit Enggau Jelan Pemesai (PKS) mega meri pemansut ngagai ekonomi menua.
“Inisiatif perintah, pekara rama enggau budaya diberi perati mega nyadi pugu pekara ti meransang ekonomi nengeri tu deras mansang.
“Nya alai bemacham pengawa ngemanah dipejalai baka kerejasama entara bemacham ejensi perintah baka Kaunsil Pemansang Beranakka Puku Malaysia (MIDA) enggau Opis Menteri Dagang Antarabansa enggau Industri (MITI),” terang iya.
Ahmad Maslan nibar ke jaku nya lebuh bejaku bejadika Kongres Serakup Penilai Asean (AVA) Ke-25 di Hotel Riverside Majestic, ditu tadi.
Berebak enggau nya ku iya, dikena mutar ke sebarang penangi enggau pemar ba pengawa nya, iya mega meri sadang penemu ngagai Sarawak ngambi nanggam kerejasama rat enggau ejensi perintah bekaul.
