KUCHING: Sarawak deka nuntut penyampau penuduk dalam parlimen entara 30 ngagai 35 peratus baka ti dirintaika dalam Ripot IGC sebedau tu.

Menteri ba Opis Menteri Besai (Parlimen enggau Undang-Undang) Datuk Seri Wan Junaidi Tuanku Jaafar madahka pengawa magi penuduk parlimen entara Semenanjung, Sabah enggau Sarawak udah salah disangka (interpretasi) laban nadai dalam IGC tauka Akta Malaysia ba England enggau Tanah Melayu.

“Kitai melaba aja utai ti disebut dalam IGC enggau penyampau pengari Sabah enggau Sarawak enda tau kelimpah atas pemendar enggau setuju Sabah enggau Sarawak empu bepelasarka genteran jaku dalam Ripot IGC.

“Maya taun 1963, Semenanjung ngembuan 145 penuduk, Sarawak bisi 24 penuduk, Sabah bisi 16 penuduk enggau Singapore bisi 15 penuduk ke alai lebuh disengkaum Sarawak, Sabah enggau Singapore kitai ngembuan 34.4 peratus penuduk iya nya lebih ari satu pertiga penuduk dalam parlimen,” ku iya.

Wan Junaidi bejaku munyi nya aum media Haribulan Bejalaika Akta A1642 ba Palan Servis Parlimen Santubong Jalai Kulas ditu, kemari.

Tandu iya, pelaba maya nya endang atas pechaya ngagai runding raban tuai Sabah enggau Sarawak jam nya ti enda tau ngubah konstitusyen enti nadai pemendar orang Sabah, Sarawak enggau Singapore.

“Singapore pansut ba taun 1965 tang 15 penuduk dalam parlimen tu enda diberi pulai ngagai Sabah enggau Sarawak, semina diberi pia aja ngagai Semenanjung.

“Nya ngujungka kitai (Sabah enggau Sarawak) semina tinggal 24 peratus penuduk dalam parlimen, nya ti deka dipinta kitai baru ngulihka lebih 30 peratus penuduk dalam parlimen.

“Enti enda salah aku, Kepala Menteri deka minta 35 peratus, nya urung penyampau penuduk maya taun 1963 kelia,” ku iya.