Sarawak mujur nanam 10.4 juta kayu dalam 18 bulan

KUCHING: Dalam timpuh 18 bulan, Sarawak mujur nanam urung 10.4 juta kayu ke mungkur 50 bansa kayu ba tanah urung 9,732.14 hektar pemesai ba nengeri tu.

Kenu ku Kepala Menteri Datuk Patinggi Abang Johari Tun Openg, nya entara pemujur program Restorasi Landskap Kampung ke dikemujur Perintah Sarawak kenyau Jun 2019 nyentuk 20 Disember tu tadi.

“Tu mega dipejalai nengah mayuh program nanam kayu ke mungkur kem batang, kebun kampung, kampung rizab, pulau galau, tanah Hak Adat Bumiputera (NCR) nyengkaum tanah ke dipenggi siku-siku orang.

“Nya alai, nengah Langgur Pemansang Malaysia Ke-12 (RMK-12), perintah negeri udah ngemendarka agih belanja penyampau RM62 juta ngagai Opis Kampung Sarawak (JHS) ungkup program restorasyen di selampur nengeri tu,” ku iya.

Iya madah munyi nya ba Program Malaysia Gadung Kimpin Nanam 100 Juta Kayu Renggat Nengeri Sarawak di Bukit Siol, ditu kemari.

Tandu iya, Sarawak ngembuan juluk deka nanam urung 35 juta kayu tauka 35 peratus kayu ba selampur nengeri tu ari 100 juta ke ditagit Perintah Besai ungkup selampur Malaysia dalam timpuh lima taun deka datai.

“Aku ngasaika kitai ulih nangkup juluk tu dalam timpuh nya kelebih agi endang udah nyadi program Perintah Sarawak ngaga menua Sarawak nyadi gadung, sereta nyukung pengawa Perintah Besai.

“Tu nyengkaum palan ke udah ditebang deka ditanam baru enggau kayu kelimpah numbuhka nurseri dikena ngemansutka paung kayu ke ulih nyadi dagang besai sereta nyendiaka servis perubat dikumbai silvikultur,” ku iya.

Nangkan ke nya, Perintah Sarawak nengah JHS mega deka ngemansangka baru tiga palan nurseri ke bisi diatu baka di Sabal Forest Landscape Restoration (FLR) Centre di Simunjan, Sarawak Tree Improvement Centre di Sibu enggau Forest Research Station di Niah.

“Kitai mega deka ngemansangka dua agi palan nurseri baru iya nya di Kayangeran Lawas enggau Bintawa Kuching dikena meransang semua orang ngemansangka enggau bela numbuhka palan nurseri kediri,” ku iya.

Iya madah, program restorasi nya endang manifestasi ari Perintah Sarawak laban Sarawak dipayung kandang kampung ke besai iya nya 7.9 juta hektar tauka 63 peratus ari pemesai nengeri tu.

Nya alai, ku iya Perintah Sarawak ngembuan peluang besai nyerungkai penatai pemisi baru iya nya dagang karbon nengah program nya nyema iya diadu enggau manah.

Suara Sarawak