SEOUL: Perintah Sarawak nerima Anugerah Perintah Digital 2023 ari Asian-Oceanian Computing Industry Organisation (ASOCIO) ditu kemari.
Menteri Utiliti enggau Telekomunikasyen Sarawak, Datuk Seri Julaihi Narawi nerima anugerah nya ngarika Perintah Sarawak ba Pengerami ASOCIO Tech Excellence Awards nyerumba ASOCIO 2023 Digital Summit.
Anugerah nya meri puji ngagai pengawa Kaunsil Ekonomi Digital Sarawak (SDEC) ti ngena infrastruktur enggau teknologi digital baka infrastruktur telekomunikasyen, hab inovasyen dikena ngemansang serikit pemungkal, palan penyulut, geran pansik translasyen enggau ke bukai.
Julaihi madah, anugerah nya meri puji ti besai ngagai Sarawak ari sebuah organisasyen ti dipandang tinggi ulih industri teknologi maklumat enggau komunikasyen (ICT) lalu nyadi chunto ngagai ekonomi ba rantau Asia-Oceania.
“Anugerah tu meransang Perintah Nengeri mai transformasyen digital ti besai agi ngagai rayat laban iya meri inspirasyen ngagai pengandal ti besai agi dalam komuniti dagang global sereta narit bakat teknologi landik.
“Pekara tu deka ngemuntang pemansang enggau pengerembai jemah ila, seraris enggau juluk ngubah Sarawak nyadi kuasa ekonomi digital baka ti diperagam Premier Sarawak, Datuk Patinggi Tan Sri Abang Johari Tun Openg lebuh iya ngelanchar Strategi Ekonomi Digital Sarawak 2018-2022,” ku iya ba sebengkah penerang berita ensanus.
Julaihi madah baru, Premier Sarawak mega ngelanchar Langkar Pengawa Ekonomi Digital Sarawak 2030 ti netapka tunga kuing Sarawak ngambi ulih nyapai ekonomi digital sereta status komuniti tebangkar manggai ba taun 2030.
