KUCHING: Perintah Sarawak nerima manah tesau ari Perintah Besai ti enda agi ngeletak atur ngena sengkabung mua ba fasiliti pengerai enggau perengka pengangkut mensia mayuh berengkah ari 5 Julai tu.
Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan madah, kebuah pia laban perintah udah mansik penuh isu pengerai mensia mayuh sebedau bejalaika sebarang atur.
“Taja pia, Perintah Sarawak meri peluang ngagai rayat diri sekali ke sida deka nerus pengawa ngena sengkabung mua tauka enda ba palan tu,” ku iya ba sebengkah penerang sehari tu.
Snowdan mansutka jaku nya rambau ngelansa senentang pemutus pemadu baru Opis Menteri Pengerai Malaysia (KKM) bekaul pengawa ngena sengkabung mua ba perengka pengangkut mensia mayuh enggau fasiliti pengerai nya.
Pekara nya dibantai Menteri Pengerai, Dr Zaliha Mustafa seraya madah, ba pengawa mansik baru atur standard pengawa (SOP) nya, sida ti positif COVID-19 enggau sida ti berubat pesakit semina diperansang ngena sengkabung mua ba kededua palan nya.
Snowdan madah, tebal agi komuniti ba menua barat enda agi ngena sengkabung mua ba palan mensia mayuh tang ba Sarawak, pengawa nya agi dikemerat ba perengka pengangkut mensia mayuh baka servis Transit Aliran Ringan (LRT) tauka kereta api.
Ku iya, bas enggau teksi ba Sarawak enda kelalu sekut tang rayat diperansang seruran bejimat lebuh ngelawa palan mensia mayuh.
