KUCHING: Sarawak ngembuan pengulih ngemansangka industri dagang temuai pengerai dikena matak mayuh agi peranak menua luar datai kitu, ku Menteri Pemansang Indu, Ruang Bilik enggau Komuniti, Datuk Seri Nancy Shukri.
Terang iya, pekara nya berebak ari nengeri tu ti nyendia bemacham program pengerai ti ulih matak mayuh peranak menua luar kelebih agi ngelingi tu datai kitu.
Ambi ke chunto, ku iya, Program Ngayuh Ensikal Pengawa Pengasih Borneo nya ulih nambahka aktiviti dagang temuai ba Sarawak.
Iya madah, program nya mega ulih nambahka penyedar mensia mayuh bekaul pengawa nagang enggau meresa tumu riman serviks.
“Aku temegah Sarawak dipilih nyadi palan bejalaika Program Ngayuh Ensikal Pengawa Pengasih Borneo sereta ngarap program tu ulih ditampung ninting taun dikena matak mayuh agi temuai datai ke Sarawak,” ku iya.
Nancy mansutka jaku nya rambau Program Ngayuh Ensikal Pengawa Pengasih Borneo ditu, sehari tu.
Ngelansa senentang riman serbiks ti bepun ari Human Papilloma Virus (HPV), Nancy madah, nya endang igi penyakit ti nyerang orang indu ba serata dunya.
Ku iya, penyakit nya nabanka beribu nyawa orang indu ninting taun sereta meri empas besai ngagai ruang bilik enggau komuniti.
Terang Kaban Parlimen Santubong nya, orang indu patut ransing ngiga penerang, meretika empas riman serviks sereta pintar nyaga pengerai diri.
