Sarawak ngerikod 33 kes angus dalam 24 jam

KUCHING: Bisi 33 kes angus dirikod dalam kandang 24 jam di Sarawak kemari.

Pemantu Direktor Operasyen Unit enggau Penyah Penusah JBNM Sarawak, PgKB I Tiong Ling Hii, rikod pemadu baru nya ngujungka penyampau semua kes angus dirikod di negeri tu kenyau 1 Ogos tu tadi manggai 216 kes.

Tandu iya, nitihka penyampau rata, JBPM Sarawak nerima 21 kes angus babas ninting hari.

“Tambah mega, sehari tu aja (kemari), dua buah rumah nyau deka angus ketegal ari api makai babas tauka kampung.

“Kes keterubah ba Kampung Sangku, Simunjan lebuh sebuah rumah angus lima peratus kena serarai api ari babas lalu sebuah agi rumah tembawai angus rumah ba Kampung Sedi, Pulau Bruit,” ku iya nengah sebengkah penerang.

NGERARA TEDA API … Siku bomba dipeda benung ngerara api ti benung makai babas.

Ku Ling Hii, bisi 40 kaban bomba nyengkaum orang kampung mantu pengawa ngerara api ti ngaguska babas ba Kampung Sedi kenyau 7 Ogos tu tadi.

“Naka tu pemesai kandang endur ke empa api tu manggai 89 ikar.

“Pengawa raban bomba ngerara api nengah bantu piko ari piak kebun sawit ke berimbai mujur nagang api ari majak nyerarai ngagai rumah ba Kampung Sedi,” ku iya.

Iya mega madah, bisi penusah angus babas nyadi ba Taman Landeh, Kota Padawan enggau Batu 13 Jalai Sri Aman-Serian.

“Kami mega bisi nerima ripot penusah angus ba Kampung Maranek, Kota Samarahan,” ku iya.

Suara Sarawak