Sarawak ngerikod siti agi kluster baru, Kluster Tanjung Genting di Sarikei

KUCHING: Opis Pengerai Nengeri ngenukuka siti kluster baru Covid-19 di Meradong, Sarikei kemari ti dikumbai Kluster Tanjung Genting.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka Kluster Tanjung Genting ngaul sebuah palan pengentap di Tanjung Genting, Sungai Mador di Pelilih Menua Meradong.

“Kes indeks datai ari kes ke-12,133 siku lelaki ke beumur 66 taun ti tabin kena 8 March apin lama.

“Kes tu siku pengereja sebuah kedai makai di Sungai Mador lalu iya ditemu positif Covid-19 kena 10 March,” ku iya.

Iya ke mega Sapit Kepala Menteri madah munyi nya ba aum pemberita Covid-19 di Dun Lama ditu, lemai tadi.

Berebak enggau nya, iya mega madahka bisi 154 kes baru positif Covid-19 dirikodka ba Sarawak.

“Kes baru tu dirikodka ba Pelilih Menua Sibu (43), Kuching (23), Kapit (20), Miri (16), Serian (13), Bintulu (13), Kanowit (6), Bukit Mabong (5), Julau (3), Samarahan (3), Meradong (3), Betong (2), Marudi (1), Bau (1), Sebauh (1) enggau Song (1).

“Tu ngujungka penyampau kes positif ketegal Covid-19 di Sarawak nambah 13,974 kes.

“Ari 154 kes baru nya, semina 22 iku aja bisi nunjukka kelai dirampit Covid-19 maya diperesa,” ku iya.

Nangkan nya, iya madahka bisi 195 kes baru udah suman sereta dikemendarka pansut ari sepital dirikodka kemari, iya nya di Sepital Sibu (78), PKRC Betong (25), Sepital Bintulu (24), Sepital Besai Sarawak (20), Sepital Sarikei (16), PKRC Sepital Kapit (16), Sepital Miri (12) enggau PKRC
Mukah (4).

“Tu ngujungka penyampau kes baru udah suman sereta dikemendarka pansut ari sepital nambah 11,215 iku,” ku iya.

Suara Sarawak