Sarawak ngerumban pemansang infrastruktur

KUCHING: Perintah Sarawak udah ngena RM21.67 bilion belanja nengeri dikena ngerumban pemansang infrastruktur ba menua tu.

Kenu ku Sapit Kepala Menteri Datuk Amar Awang Tengah Ali Hasan, RM1 bilion ari belanja tu dikena ngaga 300 tiang pemanchar nambahka pemanah servis arus penyambung.

Pia mega ku iya, RM5 bilion dikena nyeleti jalai enggau pengkalan tebing tasik, RM6 bilion ungkup Trunk Road Kedua, RM2.8 bilion ungkup bekal ai, RM2.37 bilion dikena Skim Elektrik Menua Pesisir enggau RM1.5 bilion ungkup Ejensi Pemansang Ulu Rajang, Ejensi Pemansang Tanah Tinggi enggau Ejensi Pemansang Wilayah Utara.

“Belanja tu ditambah ngagai Projek Lebuh Raya Pan Borneo beungkus RM16.48 bilion dipelanja Perintah Besai.

“Lebuh bisi penyambung enggau infrastruktur ke manah agi, kitai deka rayat Sarawak besedia napi Revolusyen Industri Keempat (IR4.0) kelimpah nambahka pengereja kitai,” ku Awang Tengah.

KENANG… Awang Tengah (tengah) begambar kenang enggau bala temuai dipebasa sereta penyereta Aum Besai enggau Mandangka Pejalai enggau Inovasyen Nengah Aplikasyen Satelit Sarawak (AISAS 2019) ditu tadi.

Iya mansutka jaku nya lebuh ngarika Kepala Menteri Datuk Patinggi Abang Johari Tun Openg bejadi Aum Besai enggau Mandangka Pejalai enggau Inovasyen Nengah Aplikasyen Satelit Sarawak (AISAS 2019) ditu tadi.

Awang Tengah ti mega Menteri Dagang Entarabansa enggau Industri, Terminal enggau Pemansang Orang Dagang madahka Sarawak enggau naka ulih mansang ngagai IR4.0.
“Kitai semua meseti besedia napi ubah baka tu sekalika kitai berubah tauka diubah.

“IR4.0 tu bepengulih nambahka penatai pemisi dunya enggau kualiti idup bejuta mensia ba selampur dunya,” ku iya nyemetak madah.

Nya alai, iya ngarapka pedagang Sarawak kelebih agi ba bidang Dagang Mit enggau Jelan Pemesai (PKS) ngena teknologi moden masang ngagai IR 4.0 lalu kreatif enggau inovatif ngambi ulih besemekih ba renggat dunya tu.

“Kitai enda ulih bepanggai ba strategi ungkus baruh, teknologi baruh enggau pengereja intensif dikena nyungkak pemansang ekonomi menua tu.

“Pia mega, makit domestik kitai mit lalu mayuh kebuah pedagang kitai ngerembaika produk sida ngagai renggat dunya seraya bekenaka teknologi digital,” ku iya nerang silik.

Kelimpah ari nya, Awang Tengah ti mega Menteri Pemansang Mengeri enggau Pengeraja Asal Kedua madahka Sarawak mega udah merambu kuing pemansang lima taun ba Strategi Ekonomi Digital Sarawak 2018-2022 dikena ngemansangka Sarawak dalam ekonomi digital.