Sarawak Renjer: Sejarah raban soldadu tebilang menua Sarawak

KUCHING: Siti batalion infantri ke bisi kaul enggau sejarah besai nyerumba Hari Sarawak iya nya raban Sarawak Renjer. Sida tu dikumbai siti tim ke pemadu tebilang nadai endur manding sereta meruan dikemegah anak Sarawak nyentuk ke sehari tu.

Presiden Gempung Veteran Soldadu Kor Renjer (PVTKR) Lt Kol (B) Mohd Melintang Abdullag madah, pun tauka sejarah penumbuh Kor Rejimen Renjer DiRaja dikaitka enggau penumbuh tim soldadu Sarawak Renjer ke dipungkal jeman perintah Brooke taun 1841.

“Ba taun 1862, Charles Brooke udah numbuhka tim Sarawak Renjer dikena nyaga pengelikun Sarawak lalu raban tu diasuh nyaga kubu-kubu ke udah digaga perintah Brooke ba serata endur di Sarawak.

“Raban tu mega dikumbai “Fortman” ba taun 1862 ditukar nama ngagai Sarawak Renjer.

“Udah nya, ba taun 1894, Sarawak Renjer diatur baru lalu dibai ngambi bagi ba sekeda operasyen soldadu nyaga pengeleikun Sarawak.

Niang Dato Sjn Awang anak Rawing enggau Presiden PVTKR Lt Kol (B) Mohd Melintang bin Abdullah (kanan).

“Penyampau kaban Sarawak Renjer mega betambah iya nya ari 32 iku ba bulan Oktober 1962 nyadi 539 iku ba bulan Disember 1930,” ku iya nusui kisah Bujang Berani nyerumba Hari Sarawak ke diintu sehari tu.

Nangkan ke nya, Melintang madah beduduk ari penanggul suntuk belanja nyadi Sarawak Renjer dipadam.

“Taja pia, aa taun 1945 maya Jipun datai di menua dia tim Sarawak Renjer diidupka baru ngelaban soldadu Jipun.

“Lepas perintah Jipun badu nguasa menua tu dia raban Sarawak Renjer diambi gawa nyadi Iban Trackers maya perang munaska komunis ti ngeruga menua Malaya sekumbang menua nya sigau tauka darurat (1948-1960).

“Lebuh ke betempur ngelaban komunis di Malaya sekeda rabab Iban Trackers tauka Sarawak Renjer terus pegari rita nyadi bujang berani ke bebendar ngelaban Komunis.

“Bisi entara raban bujang berani tu diaku pemerani lalu bisi nerima kelai basa ke pemadu tinggi baka Awang anak Rawing ke diberi midul “George Cross” kena 27 Mei 1951,” ku iya.

Nerang enggau silik agi, Melintang madah semua orang bela nemu raban Iban Trackers ari Sarawak endang ngembuan tanggung pengawa ke besai dalam munaska raban Komunis di Malaya lebih agi maya jeman Khasnya semasa Zaman darurat (1948) -1960).

“Sekumbang timpuh nya, bisi 1168 iku Iban Trakers udah dianjung raban British gawa ke Malaya.

“Sinu ngenang kena 31 Mac 1960 tim Sarawak Renjer (Malaya) Unit dipadam. Kema 1 April 1960 dia Raban Sarawak Renjer dikumbai ‘Far East Land Forces’ ditumbuh.

“Udah nya maya penumbub menua Malaysia, tim Sarawak Rangers tauka Far East Land Forces tu tadi dipadamka kena 15 September 1963 lalu ngujungka ditumbuka tim baru dikumbai Malaysia Renjer.

“Pekara tu digaga seriris enggau Sempekat Malaysia, iya nya nama Sarawak Renjer dipadam lalu ditukar enggau Kor Rejimen Renjer DiRaja. Semua kaban Sarawak Renjer diserap masuk nyadi kaban Kor Rejimen Ranjer DiRaja,” ku tandu Melintang.

Ungkup penemu Sarawak Renjer (Kor Rejimen Renjer DiRaja) chukup mayuh dianjung nyereta operasyen sekalika ba dalam tauka luar menua.

Sarawak Renjer mayuh nempa raban bujang berani ke jelai rita, Kor Rejimen Renjer DiRaja mega ditumbuh nyadi pelasar ungkup anak Sarawak nempa nama dalam bidang soldady sereta nyaup ngetanka pengelikun menua. Bisi mega anak Sarawak dalam Kor Rejimen Renjer DiRaja diberi peluang mangku pengawa ke tinggi sereta dianjung gawa ngagai tikas entarabangsa.

“Di menua tu, sida udah mujur mandangka pemerani diri berambun nyawa ngelaban komunis ke pengelantang anak uchu ke nguan nengeri Sarawak.

“Pemerani sida betempur berambaika jaku “ Agi Idup Agi Ngelaban!” terus nyadika peransang lebih agi ba raban Kor Rejimen Renjer DiRaja.

“Nya alai, nyerumba Hari Sarawak, semua kitai patut beratika baru pemerani raban soldadu Kor Rejimen Renjer Diraja ke udah berambun nyawa ngetanka pengelikun enggau pengelantang menua Sarawak ke disayau kitai,” ku iya.

Suara Sarawak