Sarawak sebuah wilayah, ukai nengeri!

KUCHING: “Berengkah ari diatu kitai anang enda ingat Sarawak endang sebuah wilayah ukai nengeri,” ku Menteri Besai Datuk Patinggi Tan Sri Muhyiddin Yassin.

Kenu ku iya, tu mih meri bida Sarawak enggau nengeri-nengeri bukai ba Malaysia tambah mega nengeri tu ngembuan tanah ke chukup besai.

“Aku berasai lantang ati maya datai ke Sarawak, iya nya sebuah wilayah di Malaysia.

“Nya alai, berengkah ari diatu kitai anang enda ingat iya nya Sarawak ukai nengeri tang iya sebuah wilayah.

“Nengeri tu sebuah wilayah ke chukup kering, aku enda ulih nyebut iya dikumbai sebuah nengeri laban Sarawak chukup besai taja ngembuan penyampau rayat enda mayuh,” ku iya.

Iya madah munyi nya maya Program Merarau Tuai Begulai Enggau Tuai Raban Bansa ke bela digulu bala tuai Perikatan Nasional (PN) Sarawak enggau Gabungan Parti Sarawak (GPS) ditu kena Hari Lima.

“Sarawak mega ulih nyadi chunto penyerakup laban ngembuan gempung enggau kaul ke chukup badas entara pupu bansa enda ngira bansa enggau penatai.

“Sarawak endang chunto di Malaysia ba sentang penyerakup ulih begulai dalam mayuh pekara,” ku iya.

Iya mega nyemetak mansutka pekara nya program Randau ‘Wawasan Kemakmuran Bersama 2030 @ Sarawak’ ditu kena Hari Empat tu tadi.

Ku iya, Sarawak endang siti ari tiga wilayah di Malaysia nitihka ke udah ditanggam dalam Sempekat Malaysia 1963 (MA63).

Suara Sarawak