ARTIKEL

ABANG JOHARI TUN OPENG

Sarawak sedia mantu Nusantara

Facebook
Twitter
LinkedIn
WhatsApp
Telegram

KUCHING: Perintah Sarawak udah nanggam kerejasama enggau Indonesia ngambi meri bantu ba pemnsang di Nusantara kelebih agi Kalimantan Timur enggau Kalimantan Utara.

Premier Sarawak, Datuk Patinggi Tan Sri Abang Johari Tun Openg madah, berindik ari nya, Sarawak Energy Berhad (SEB) udah beranakka puku mansutka kuasa di wilayah Malinau, Kalimantan Timur nengah saham 25 peratus ba pemansang hidro.

“Tu deka mansutka kuasa ngagai Kalimantan enggau bisi perambu ari menua Indonesia deka ngerembaika agi hidro tu.

“Kitai udah bisi 25 peratus saham, nya kebuah kitai deka begulai bejalaika pemansang di Nusantara,” ku iya.

Abang Johari mansutka jaku nya lebuh dirandau pengudah ngemata pengawa nyuaka Sumbangsih Raya 2024 ti dipenyadi bini iya, Puan Sri Datuk Amar Juma’ani Tun Tuanku Bujang di Wisma Bapa Malaysia, ditu kemari.

Iya mansutka jaku nya lebuh ngelansa buah penemu Duta Besai Malaysia ke Indonesia, Datuk Syed Md Hasrin Tengku Hussin ngambi serikat Malaysia patut ngerebut peluang ari sukut beranakka puku di wilayah Kalimantan Timur, kelebih agi ba Samarinda dan Balikpapan besemak enggau indu mengeri baru Nusantara ti deka datai.

Syed Md Hasrin madah, bisi mayuh peluang ungkup serikat Malaysia mantu pemansang Nusantara baka nyendiaka kereban ngaga begunan.

Pia mega, Abang Johari madah, Balai Dagang Bumiputera Sarawak (DUBS) enggau Balai Dagang enggau Industri china Sarawak Begulai (ACCCIS) mega udah nanggam rentayan kerejasama enggau Kamar Dagang dan Industri Indonesia (KADIN) ngambi nyerungkai pekara bukai nyengkaum eksport barang ari Sarawak.

“Kitai udah bisi kaul kerejasama enggau Indonesia lalu mayuh serikat di Sarawak udah bejalaika dagang kelebih agi di Kalimantan Barat laban semak agi enggau kitai,” ku iya.

Nambahka nya ku iya, pengudah Indonesia muka adan menua enggau ngemendar penerebai entara Sarawak enggau Pontianak, nya deka meri peluang kerejasama ti rat agi entara Indonesia enggau Sarawak.

BERITA LAIN

BERITA TERBARU