KOTA SAMARAHAN: Perintah Sarawak ngelalu perambu gerempung ari luar Sarawak ba pengawa nempa nengeri tu nyadi tuai rumah endur ngatur lumba ba renggat nasional.
Menteri Nembiak, Lumba enggau Pemansang Orang Dagang, Datuk Seri Abdul Karim Rahman Hamzah madah, pekara nya seraris enggau juluk opis menteri sida ti deka nempa Sarawak nyadi sebuah Palan Kuasa Lumba dudi hari.
“Kitai ditu seruran meri sukung ngagai sebarang gerempung ti deka mai pemansang lumba ba Sarawak.
“Ambi ke chunto, baka Pekit Bemacham Bol Sekula Sekondari Kediri China Renggat Nasional Ke-10 2023 tu.
“Perintah Sarawak endang angkunka pengelanchar pekit tu sereta merambu deka ngatur pekit tu ba bagi menua bukai ba Sarawak ditu dudi hari,” ku iya.
Karim mansutka jaku nya rambau bejadi Pekit Bemacham Bol Sekula Sekondari Kediri China Renggat Nasional Ke-10 2023 ba Balai Tunku Abdul Rahman (DeTAR) Putra, Universiti Malaysia Sarawak (UNIMAS) ditu, kemari.
Nya meh keterubah Sarawak nyadi tuai rumah endur ngatur pekit nya ti dipasuk 43 sekula sekondari kediri China ari selampur Malaysia.
Pekit ke-10 nya dipasuk 1,700 penyereta ti deka besatup ba empat kategori lumba baka bol keranjang, bol tampar, badminton enggau ping pong.
Iya mega ngelalu penatai bala kontinjen ba lumba nya seraya madahka 60 peratus ari penyereta nya endang keterubah iya ngindikka kaki ke Sarawak.
“Kena meh peluang tu betemu enggau bala bakih ti baru baka ditemu kitai, Sarawak ngembuan 34 etnik,” terang iya.
