Sarawak sekali agi ngerikod nadai kes positif Covid-19

KUCHING: Sarawak sehari tu tadi sekali agi ngerikod nadai kes positif baru covid-19.

Tu kedua kali nengeri tu nadai ngerikod kes positif baru pengudah keterubah iya ngerikodka nadai kes kenaka 4 Mei tu tadi.

Kelimpah ari nya, Sekretariat Komiti Penyangga Penusah Ngenyit Nengeri Sarawak (JPBNS) ba siti penerang sehari tu mega madah bisi 67.96 peratus kes positif ba nengeri tu udah gerai sereta dikemendarka pansut ari sepital.

Bisi semilan kes udah suman sereta dikemendar pansut ari sepital kemari lalu semua kes nya diripotka ari Sepital Besai Sarawak (SGH).

Ba lansa ke sama, JPBNS madahka penyampau Pesakit Agi Dipatau (PUI) bisi 57 kes lalu 42 kes agi nganti pemutus ari makmal.

Berebak enggau nya, bagi menua Bintulu udah betukar ari pelilih zon kuning ngagai zon gadung pengudah 14 hari nadai ngerikod kes positif baru dalam kandang 14 hari.

Berindik ari nya, bisi 32 iti pelilih menua di Sarawak udah nyadi zon gadung, tujuh pelilih zon kuning nyengkaum Samarahan, Tebedu, Lundu, Sibu, Bau, Serian enggau Limbang lalu Kuching agi ba zon mirah.