KUCHING: Sarawak patut temegah laban jaku ‘Segulai Sejalai’ mujur dipilih Menteri Besai, Datuk Seri Anwar Ibrahim nyadi rambai jaku penyerakup menua ti ngelai jaku bansa Iban majak jelai rita ba menua bukai.
Menteri Industri Pemakai, Komoditi enggau Pemansang Wilayah Sarawak, Datuk Seri Dr Stephen Rundi Utom madah, rambai jaku nya ukai pekara baru ba Sarawak laban ngelai kaul rayat pupu bansa ba menua tu.
“Kitai patut ingat rambai jaku ‘Segulai Sejalai’ tu suba datai ari penemu Datuk Patinggi Tan Sri Alfred Jabu ti mai raban bansa Iban beserakup.
“Ba Semenanjung Malaysia, jaku tu engka agi baru, nya alai kitai patut magi awak ngagai sida meretika reti jaku tu tang ba menua kitai empu jaku tu sigi udah teleba dikena,” ku iya.
Rundi bejaku munyi nya rambau Pengerami Ngabang Gawai WaiFM Radio Televisyen Malaysia (RTM) Kuching nengah kerejasama Opis Betanam Betupi Sarawak sereta Gerempung Bansa Dayak Sarawak (SDNU) ba palan entepan entukar RTM Kuching ditu, malam kemari.
Ngelansa senentang program nya, Rundi madahka diri deka nyukung pengawa RTM ba pengawa ngatur program nya ninting taun.
