KUCHING: Perintah Sarawak betuai ke Premier Sarawak, Datuk Patinggi Tan Sri Abang Johari Tun Openg terus ransing ngemansangka nengeri tu.
Abang Johari madah, pemansang dipejalai ngena chara besusun enggau beripih berengkah ari mengeri besai baka Kuching, Sibu enggau Miri.
“Pemansang ba menua tu dipejalai endang bechuanka pemayuh tubuh enggau pemeruan rampa menua.
“Endang juluk ati perintah deka numbuhka mengeri enda kelalu sekut tang bisi mengeri ti bedandang sereta berundingka penyampau peranak dia ngambi enda sekut kelebih agi ari sikut pejalai trafik,” terang iya.
Abang Johari bejaku munyi nya rambau Pengerami Makai Lemai ‘ASEAN Valuers Association’ (AVA) ke-25 ditu malam tadi.
Berebak enggau nya, iya madah ke pemansang di Sarawak nyelinting pemeruan rampa menua ungkup pemaik timpuh panjai baka ti diripih dalam Strategi Pemansang Udah Covid-19 (PCDS) 2030.
