Gawai Dayak taun tu bebida ari taun ke udah
TATAU: Pengerami Gawai Dayak ke diintu peranak Rumah Linggie Layang, Lot 1 Block 33, Kakus Land District, Tatau taun tu bebida ari taun ke udah laban sida udah bisi nerima bekal kuasa karan 24 jam ari Sistem Solar di baruh Skim Bekal Kuasa Karan Alternatif Menua Pesisir (Sares).
Penyanding Penemu sida serumah, Sang Sanjan, 40 taun, meri besai terima kasih ngagai Perintah Sarawak, Opis Menteri Utiliti Sarawak enggau Sarawak Energy sereta raban bukai ti udah bebendar bejalaika pangku pengawa diri nitihka pematut.
Ngelansa pasal projek nya ku Sang, berengkah digaga kena 21 Disember 2018 lalu mujur tembu nitihka timpuh ti diperambu, bulan April taun tu tadi.
Mandangka pengelantang diri, sida serumah ngatur pengerami makai selamat seraya ngintu pemujur projek ti diintu ngena adat lama, bebanchak jani enggau miring kena tumu pagi 31 Mei dikena minta berekat ari Petara.
Ku Sang, sida serumah bisi berasai lempung agi ba pekara belanja laban badu kiruh bebelika minyak injin api lalu belanja ulih dikelimat dikena meli barang bukai.
“Ngelama tu, kelimpah ari betatika pemar pejalai ngerenchah jalai batang urung tiga jam setengah ari Pasar Tatau lebuh mulaika diri ke menua, runding enda limpang ngira belanja meli minyak injin api sereta belanja bukai.
“Bekal kuasa karan ari solar tu mega likun dikena laban disambung nitihka standard operasyen ti ditetap nentuka pengelikun dijamin.
“Pulai sekali tu berasai lempung amat ba belanja, jauh amat insur,” ku Sang seraya nambah, enti nengah jalai ai mudik Sungai Kakus urung lapan jam endur ngenataika diri ba rumah panjai sida.
Nya kebuah sida serumah besai amat pengandal udah tu deka mayuh agi pemansang bukai deka datai kelebih agi ngaul infrastruktur pemun baka sambung jalai enggau bekal ai beresi.
“Kami serumah mega ngelaluka projek pemansang bukai baka bekal ai paip enggau ngaduka manah agi jalai batang ke bisi diatu, enda ngira ari perintah nengeri tauka perintah besai.
“Tu nyengkaum peminta ngagai perintah nengeri enggau perintah besai ngambi nyeleti enggau ngemanahka jalai sepanjai 7km ngelawa rumah panjai ari jalai batang digaga kompeni KTS enggau Samling.
“Kami ngasaika diri bisi hak ngasaika pemansang baka rayat bukai, nya kebuah kami ngansak sebarang ejensi enggau opis perintah bela beratika peminta sereta ulih gawa ngintu pengelantang kami ti diau di menua pesisir,” ku Sang madah nyemetak.
Nya alai, iya ngelempaika pengandal ngagai pengari rayat mendingka peminta peranak dia kelimpah saup ari ejensi sereta opis perintah bekaul pulaika pemaik semua.
