Sarikei-Betong dikemansang nyadi pengeluar pemakai

SARIKEI: Penau besai Sarikei nyadi pengeluar pemakai ba kandang menua tengah Sarawak deka terus dikemujur seriris enggau lukuk nyungkak tikas ekonomi rayat lebih agi ba menua pesisir.

Kepala Menteri Datuk Patinggi Abang Johari Tun Openg madah, atur proaktif nya deka meri pemaik besai ngagai rayat ungkup timpuh panjai.

Nengah atur nya ku iya, perintah ukai semina ngemansangka sektor betanam betupi tang mega infrastruktur pemun ke chukup diguna rayat lebih agi ba sitak menua pesisir di Sarawak.

“Kitai deka bagi menua Sarikei nyentuk Betong nyadi pengeluar pemakai ukai semina ngagai Malaysia tang mega menua luar.

“Taja pia dikena nyapai juluk nya, kitai patut ngemansangka perengkaguna be pemadu beguna baka jalai raya ke nyadi penyambung ngagai rayat, kelimpah ngemuntang pejalai sida nganjung asil betanam betupi,” ku iya rambau pengerami Hari Kebangsaan Renggat Negeri ditu, pagi tadi.

KAMI NGEMUJUR PEMANSANG…Datuk Patinggi Abang Johari Tun Openg (tengah) begulai enggau bala pemesai ke bukai ngitau Jalur Gemilang rambau ngintu Hari Kebangsaan Renggat Negeri ditu, pagi tadi.

Iya mega meri jamin perintah deka terus bebendar ngemanahka sistem penyambung awakka tau ngelengkaska agi pemansang lebih agi ba kandang menua pesisir.

Ku iya, entara perengkaguna ke benung digaga baka Jematan Nanga Lassa, Jamatan Paloh enggau Jalai Pasi ti besambungka Sarikei enggau Tanjung Manis.

“Berebak enggau nya, kitai mega nemu pasal guna enggau pematut ngaduka perengkaguna bukai baka bekal ai enggau karan.

“Amat enda bula, Sarawak ngasaika mayuh pemujur kenyau 65 taun ke udah lalu kitai terus nyingkang dikena nyapai juluk nya nyadi sebuah nengeri maju manggai taun 2030.

“Nya alai, aku meransang rayat terus begempung enggau meri sukung penuh ngagai perintah awakka agenda pemansang terus dikemujur,” ku iya.

Pengerami ngirup pagi nya dirichah enggau mayuh bengkah aktiviti ke manah baka mandangka pengawa merindang.

Berebak enggau nya Kepala Menteri mega bisi ngemujurka pengawa nyuaka bantu ngagai sekeda penerima nyengkaum anak mit ke baru ada.