ARTIKEL

SARIPAH TUAH

Saripah Tuah angkun ngangkat pesaka Bisaya

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

ANGKUN deka nyaga kereban asal raban bansa Bisaya, Saripah Tuah, 44 bejalaika dagang ngelakuka semua kereban tradisional Bisaya awakka enda punas disegang arus pemansang dunya ti majak moden.

Asal ari Kampung Mengaliong, Limbang, indai ngagai tiga iku anak tu udah mujur muka kedai kediri ti dikumbai Mrs Rz Bisaya Kuching Craft.

PRODUK… Saripah benung ngaga kraf jari bansa Bisaya.

Ku iya, nyau deka semua kereban pengias bansa Bisaya dijual iya nyengkaum kereban indu enggau lelaki baka pekayan asal, singal asik, purak, manas selawa, kupu kupu, padapun, rogot, golong sengkadan, golong alu alu, kebamban enggau ke bukai.

“Aku berengkah ngadu pengawa bejual tu dalam taun 2018, berengkah nyual ari online enggau muka palan bedaja lebuh bisi pengerami.

“Tang barang aku laku agi dijual ba online laban selampur menua ulih meda kelebih agi sida di Sibu, Miri, Limbang, Sabah enggau Kuching,” ku iya lebuh dirandau Suara Sarawak, kemari.

Ku iya, ngelakuka kereban dagang ari online muntang lalu jampat bulih pemeli laban diatu nyau semua orang bisi pelasar media rama kediri empu.

DAGANG ONLINE

“Semua kraf jari tu digaga aku empu, sigi tulin ari asil pengelandik jari aku empu.

“Aku belajar ngaga kraf jari bansa Bisaya ari orang tuai suba, lebuh sida udah midang pengawa tu ditampung aku laban aku enggai meda krafjari asal bansa Bisaya tu pupus,” ku iya.

PEMILIH… Sekeda barang ti dijual Saripah.

Iya madah ari mit sigi udah rindu meda asil kraf jari kelebih agi pekayan lama indu Bisaya ti nyelai sereta bebida ari bansa bukai.

“Lebuh udah nemu ngaga dia aku berunding deka nyual kereban tu nyengkaum nyual pekayan asal raban bansa Bisaya indu enggau lelaki.

“Dalam setaun nguji bejual aku meda bala pemeli majak nambah, nya alai aku neruska pengawa nyual kraf jari tu nyentukka diatu,” ku iya.

Ku Saripah, dalam sebulan iya ulih nyual lima pasang pekayan tradisional kelimpah bejual kereban bukai baka marik enggau gelang.

“Laban aku ngaga semua tu kediri, awak sigi kelalu serekat, nya alai aku enda ulih mayuh ngambi udar ari pemeli.

“Aku nyau meri timpuh ngagai bala pemeli ngambi barang sida enti udah tembu laban kekadang barang dikena aku ngaga krafjari nya mimit,” ku iya.

Iya madahka, pemar ti pemadu besai ngagai iya lebuh berunding enggau pemeli ti mayuh mejah pengawa.

ENDA MUDAH MANTUL

“Bisi ti minta tukar chura enggau ulah bukai, kekadang sinu meda utai udah nyadi baru sida bejaku.

“Semua nya ngena puku aku empu magang, taja pia, aku enda lemi semangat laban aku nemu ulah mensia sigi mayuh macham.

“Aku enggau naka ulih nembuka udar nya nyentuk sida tepantup ati, aku pen gaga,” ku iya.

Iya madah, kereban asal raban bansa Bisaya tu enda tau dipeda sepiak mata aja, tang meseti disimpan ke pesaka lama ungkup nembiak rebak baru.

“Nyema bisi nembiak deka belajar ngaga kereban asal bansa Bisaya, gaga enggau manah sereta anang ngubah sengapa.

“Aku ngarapka nembiak rebak baru ulih belajar sereta nyaga kereban asal tu awakka enda pupus.

“Ngagai aku empu, aku ngarapka diri terus mujur dalam pengawa lalu dagang aku majak ngerembai awakka ulih dikelala mensia mayuh,” ku iya.

Iya mega madah, pekayan asal bansa Bisaya ukai semina dibeli bansa asal nya aja.

Tang mega dibeli raban bansa bukai laban pekayan nya tampak nyelai enggau bebida ari pekayan tradisional bukai kelebih agi peranak di Kuching.

BERITA LAIN

BERITA TERBARU