Saspek ngerumpak rumah digiga polis

KUCHING: Polis diatu benung nyidi siku lelaki dipelaba saspek kes ngerumpak ba Taman Juta Ria, Jalai Matang ditu apin lama ke udah.

Sapit Tuai Polis Pelilih Padawan, DSP Lim Jaw Shyong madahka lelaki benama Amir nya dipelaba saspek besai dalam kes nya.

Ku iya, tiga saspek bukai bisi kaul dalam kes nya udah ditan polis dalam timpuh 24 jam ari hari penusah nyadi.

“Ketetiga saspek udah ditukuka bisi kaul dalam kes ngerumpak nya pengudah ditukik enggau dikelala.

“Sida tiga nya mega ngaku diri begulai enggau siku da saspek benama Amir.

“Amir tu siku ari tiga saspek ti nyerungkai rumah orang nya seraya siku agi saspek nganti ba luar,” ku Lim nerang ba sebengkah penerang tadi.

Iya madah, sida tiga nya udah ditan reman pengelama tujuh hari berengkah ari 4 nyentuk 11 April.

“Enti ditemu salah, semua sida tu tau kena jil 20 taun enggau kena lunsin.

“Asil pansik ngagai saspek ke ditangkap, polis agi nyidi Amir dipelaba saspek besai kes tu,” terang Lim nyentuk.

Berindik ari nya, iya minta mensia mayuh ti bisi penerang pasal saspek dipinta telefon ngagai pegawa pemansik, Inspektor Stiffan ba lumur 014-6750181.

Suara Sarawak