SIBU: Penyikar mensia mayuh ngemuntanka ulah siku saspek ti nguji ngeruntun siku indu ditu kena pagi Hari Krismas.

Mensia mayuh ke bisi dia ngagai lalu nangkap saspek nya pengudah sida begau ninga nyawa indu manjung minta tulung pengudah kantung iya diruntun.

Ketuai Polis Pelilih Sibu ACP Stanley Jonathan Ringgit madah, penusah nyadi urung pukul 9.30 pagi.

Indu beumur 38 taun ti ngaga riport madahka diri benung meli ubat ba sebuah kedai farmasi ba Jalai Sentral lebuh saspek datai kia lalu ngeruntun kantung sandik iya.

“Tekenyit kantung sandik diruntun, indu nya lalu manjung naka pengingar ngujungka mensia mayuh ke bisi besemak dia mantu iya ngagai saspek nya,” ku Stanley lebuh dirandau, kemari.

Kenu ku iya, saspek ti kesal ati pengudah nemu diri digaga, teterap ba tengah jalai lalu nyerah diri ngagai mensia mayuh.