Saup polis nagang pengawa enda menuku

SARATOK: Indu Opis Polis (IPD) Saratok seruran randaka saup ari mensia mayuh dalam nagang penyadi kes-kes ti enda menuku ba pelilih menua tu.

Kepala Polis Pelilih Saratok,DSP Mordani Tanin sida begunaka saup ari mensia mayuh meri penerang nyema bisi tepedaka sebarang pengawa ti enda menuku tauka ngelanggar undang-undang.

“Piak PDRM Saratok besai amat pengarap ngagai mensia mayuh awak semampai nyaup piak polis.”

“Pengawa nyaga pengelikun tentu tusah nyema nadai sukung enggau tulung ari mensia mayuh, nya alai pengawa nya enda patut dilempaika ngagai piak polis aja.”

“Ari saup mensia mayuh mega genap iti penanggul ti datai nuntung ulih lengkas diputar.”

DSP Mordani Tanin madah munyi nya maya bejaku lebuh bejadika Program Community Policing Indu Opis Polis Pelilih Saratok ba Rumah Mudit,Lubok Lidong,Kaki Wong ditu tadi.

Nambah nya ku iya, diatu IPD Saratok semina ngembuan sepenyampau 126 iku pengereja pengawa (pegawai) ti napi tanggung pengawa ngemata sepenyampau 51000 mensia peranak Saratok.

“Taja tubuh kami mimit, tang nya ukai kedalih piak kami (IPD Saratok) enda ulih bejalai ke pengawa enggau manah.”tandu iya.

Program PDRM tu mega program keterubah iya dipejalai Indu Opis Polis Pelilih Saratok ba taun tu lalu digulu urung 200 iku rayat ke besemak.

Sama bisi datai Pemesai Pelilih Saratok,Mohd.Ikhmal Abdullah,Ketuai Balai Bomba Saratok PPgB Nazry Mohamat,Ketuai Pengelikun Bekaul Jalai Alun IPD Saratok,ASP George Shua Apau Pana sereta enggau bala bukai.