Saut peransang ‘perang’ ari KM, ku Uggah

BAU: Kaban Gempung Parti Sarawak (GPS) patut nyaut peransang perang ti disadaka Kepala Menteri (KM) Datuk Patinggi Abang Johari Tun Openg.

Sapit Kepala Menteri Datuk Amar Douglas Uggah Embas madah, kaban GPS patut seati, berakup pengering enggau sedia ‘beperang’ maya pengawa bepilih besai nengeri (PRN) ila.

Iya madah diri, chukup andal enggau kubu kering GPS ba Serembu ulih ditan maya Prn deka datai ngambika pemansang ba Serembu terus ditampung.

Ku Uggah, parti GPS endang parti diiring anak Sarawak diuluka Kepala Menteri sereta Adun ti chukup ngelala pengingin rayat.

Ku iya, Abang Johari ngembuan peneleba nyadi ketuai, nemu asai ati rayat kelimpah pintar ngatur nengeri Sarawak.

Datuk Amar Douglas Uggah

“Iya udah bejalaika chukai jual lima peratus ungkup minyal lalu untung penyampau tiga billion asil ari chukai nya.

“Nya kebuah Menteri Wang Lim Guan Eng pedis ati enggau atur belanja ke digaga Kepala Menteri kitai,” ku iya.

Iya madah munyi nya rambau bejadika Pengerami Gempung Parti Sarawak (GPS) renggat Dun Serembu diatur ba Kampung Skio, Serembu, kemari.

Ku iya, pemutus pansut ari BN endang pemutus ke pintar laban politik di Semenanjung semina mechahka rayat.

Tandu Uggah, pemansang menua pesisir ditampung ba Sarawak awakka penatai pemisi rayat betanambah lalu rayat ulih idup lantang.

“Penyakal nguna mayuh dalih dikena mechah enggau nguingka runding rayat Serembu,” ku iya.

Berebak enggau nya, Uggah bisi ngemendarka agih belanja RM100,000 dikena ngemanahka Gerija St Andrew Skio nengah Unifor.

Udah nya, Adun Serembu Miro Simuh madah, kaban GPS endang nyadi tiang sukung ke besai reti ngagai GPS.

Kenu ku iya, nadai orang bukai ulih ngachau anak Sarawak ari terus ngintu nengeri tu laban Sarawak ulih bediri kediri empu.

Ku Miro, mayuh bengkah projek dipejalai ke pemaik rayat menua tu.

Nya kebuah, kenyau setaun Pakatan Harapan udah megai menua, tang nyentuk ke sehari tu nadai sebarang projek ungkup Sarawak tang ke mayuh agi nya dikinsil.

Nyadi, penyukung GPS patut nyaut jaku peransang perang ari KM dikena nyatup PH ba PRN deka datai.

“Kaban GPS patut nyadi pengari ngelakuka GPS ba renggat baruh.

“Kitai meseti nentuka GPS terus tegap ba Sarawak sereta terus ngiring nengeri tu,” ku iya.

Sama bisi datai Adun Tasik Biru Datuk Henry Harry Jinep, Adun Layar Datuk Gerald Rentap Jabu, Adun Bukit Semuja John Ilus enggau bala tuai raban bansa.

Urung 2,000 penyukung GPS datai ngerichahka pengerami nya.

Suara Sarawak