SDBWA deka ngatur pekit gumpal isi kena 14 Sept

SIBU: Gerempung Main Gumpal Isi enggau Angkat Berat Menua Sibu (SDBWA) deka ngatur International Base Jump Bodybuilding and Physique Championship 2019 beserimbai enggau Sibu International BASE Jump 2019.

Presiden iya Chia Soon Cheong madah, pekit tu deka diatur ba Dataran Tun Tuanku Bujang Fasa II kena 14 September ila.

“Pekit tu dibuka ngagai semua peranak Malaysia ke beumur 16 taun ke atas lalu bayar panjar nyereta pekit semina RM50 ungkup siti kategori.

“Pekit tu mega bisi dibagi ngagai tiga kategori iya nya Men’s Physique, Men’s Bodybuilding (70 kilogram enggau ke baruh) sereta Men’s Bodybuilding (70.1 kilogram enggau ke atas).

“Kelimpah nya, perais trofi enggau wang RM300 nganti pemenang ke mujur bulih gelar Best Poser,” ku iya nengah sebengkah aum pemberita ditu, kemari.

SAMA NGUJI…Chia (tiga kiba) sereta kaban komiti bukai ngelaluka mensia mayuh nyereta International Base Jump Bodybuilding and Physique Championship 2019.

Ungkup kategori Men’s Physique, champion deka mai pulai perais RM1,000, trofi, midul enggau produk produk suplemen, pemenang lumur dua deka nerima perais RM500, trofi, midul sereta produk suplemen lalu lumur tiga nerima perais RM200, trofi, midul enggau produk suplemen.

“Udah nya, perais RM2,000, trofi, midal engau produk suplemen mega nganti champion kategori Men’s Bodybuilding ungkup dua kategori (70 kilogram enggau ke baruh) sereta (70.1 kilogram ke atas).

“Pemenang lumur dua deka nerima perais RM1,000, trofi, midal enggau produk produk suplement sereta perais wang RM500, trofi, midul enggau produk suplemen ungkup penuduk lumur tiga ba kededua kategori nya,” ku iya.

Penerang silik pasal pekit tu tau betelefon terus nuju Chia Soon Cheong ba lumur 016-8861015 tauka Martin Voon 016-8895600.

Sama bisi datai ba aum pemberita nya Pemesai Pengatur Pengawa Opis Residen Menua Sibu Awang Mohammed Nizam.