Seati ngerami Gawai Raya

KUCHING: Pengerami Gawai Raya ti diintu ulih neguhka penyerakup rayat pupu bansa enggau bida pengarap.

Dewan Bandaraya Kuching Utara (DBKU) semampai ngemeranka ulah pemereti ati enggau bebatak asur sereta semengat kerejasama ti nadai bebagi.

Pengerami diatur DBKU di Auditorium DBKU richah enggau penatai temuai dipebasa Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Syarifah Hasidah Sayeed Aman Ghazali.

Bemacham pemerindang dibantai ngerichahka agi pengerami baka belagu enggau tanda asal setipak enggau tuju pengerami Gawai Dayak enggau Hari Raya Aidilfitri.

Sebedau nya, gempuru besai DBKU udah diatur muakka pagi lalu digulu Datuk Bandar Kuching Utara, Datuk Haji Abang Abdul Wahap Haji Abang Julai.

RICHAH… Bala indu bebajik ngena ngepan asal Orang Ulu enda muai peluang begambar enggau temuai dipebasa.

Kenu ku Abdul Wahap, DBKU deka ngintu Makai Taun Hari Mengeri Besai Kuching Ke-31 kena 1 Ogos tu.

“Pengawa ngintu makai taun tu deka diatur ba Dewan Kompleks Islam Tuanku Abdul Halim Mu’adzam Shah berambaika jaku ‘Empowering Smart Community’,” ku iya lebuh bejaku ba mua mayuh rambau gempuru besai nya.

Kelimpah ari nya, iya meransang raban gawa DBKU deka seruran meri komitmen tinggi maya bejalaika pangku pengawa sida meri servis pemadu manah sereta ngasi ngagai peranak ditu.

“Kita mega patut seruran besaup gawa enggau nerenak semengat DBKU maya gawa besehari sehari.

“Tabi puji ngagai Tim Batak Tali DBKU laban mujur bulih Penuduk Ketiga ba pekit Main Batak Tali beserimbai enggau Pengerami Sematan 2019 minggu nyin tadi.

“Tabi puji besai ngagai Menijar Tim Batak Tali DBKU, Encik Dusten Mogei enggau kesemua kaban tim nya,” tandu iya.

Berebak enggau gempuru besai nya, DBKU ngerami tiha staf sida ti pinchin gawa sereta nyuaka Anugerah Servis 25 Taun ngagai lapan iku staf ejensi kaunsil nya.

Sida ti pinchin gawa mega bisi nerima Setipikit Ngenang Jasa enggau tepa seraya staf ti udah 25 taun gawa nerima Setipikit Ngenang Jasa enggau Puku ASB penyampau RM 500 ungkup Bumiputera sereta Puku Bank Simpanan Nasional (BSN) Sijil Premium penyampau RM 500 ungkup bala bukai.

Suara Sarawak