Augustine Merikan tauka digela orang Bujang Paku Lawang ketegal lagu nya ke udah ngangkatka nama iya ba dunya pemerindang di menua Sarawak ditu.
Nyerita lansa pejalai diri ba dunya pemerindang dia, Augustine madahka ketungkah iya udah enggau orang ba pengawa pemerindang ari taun 1985 suba dia iya endang enggau ati ti chukup andal, bisi jemah ila bala kitai (Dayak) numbuhka siti gempung ke ulih ngadu tauka ngagihka royalti agai bala kitai ke nyadi pemerindang nyengkuam penanyi, pemuzik, penengkebang lagu enggau ke bukai.
“Asaika udah lama ga tudah diri udah enggau bala ngemeranka pengawa belagu tu tang asil nya nadai pulai agai diri empu tang enda nemu kini tauka baka ni ka bulih tauka nerima asil tauka royalti.
“Dulu suba aku bisi enggau bala nyadi kaban PRISM tang mina tiga kali aja dibayar sida royalti. Tang udah nya nadai munyi agi sampaike sehari tu.
“Nya mih ke mai diri semampai meratika nya belama. Kitai belagu tang orang nerima asil. Kitai nama utai ulih tak tetiap taun ngetup tunjuk aja sereta ningga orang besebutka pasal royalty penanyi.
“Naka tu bala kitai ka peminat seni sada nyawa, muzik enggau ke bukai di Sarawak udah ngeleda lalu ngerumpang jalai ngaduka bala kitai ambi semua ulih nerima royalti tetiap taun ke deka datai.
“Nadai kebuah ga kitai penanyi, pemusik, penengkebang lagu enggau ke bukai enggai sama nyukung pengawa ka manah laban tau pulai ke penguntung semua.
Nya alai, aku ngarika Gerempung Artis Iban Sarawak (Parisa) ke mega Chairman Parisa sereta enggau bala kaban Parisa ke bukai sigi endang enda belampung ati nyukung enggau penuh pengawa MRSB (Music Rights Sarawah Berhad) nyadika siti ejensi ngaduka royalti anak seni di Sarawak,” ku iya madah nengah sebengkah penerang, kemari.
Nampung sebana diri, Augustine madah nama kebuah pia, sida ari Malaya nyin nadai entu ibuh ka hal bala penyanyi etnik di Sarawak ditu lalu digaga ba anak tiri sida belama.
“Bisi ga meri munga mit tang ka bendar sida endang ngisi perut sida ka din lalu kitai kekesap sereta pepeli mata aja.
“Ngarapka MRSB tu mujur mih ngaduka pengawa laban kitai tu bisi nerima sukung ka penuh ari Menteri ke mega anak Sarawak iya Datuk Seri Alexander Nanta Linggi, Chairmain MyIPO Datuk Mohammad Alamani, Chairman ARAS (Persatuan Armada Anak Seni Sarawak) Tuan Gibson Rentap begulai enggau MRSB sereta disukung sida SCORE ke betuaika Tuan Azmin Mudin ari Sabah.
Sama mih kitai begulai sejalai besukung betulung ngambika MRSB tu mujur bejalaika pengawa di Sarawak ka meri penguntung agai bala kitai Orang Seni ari segi nerima Royalty ka dudi hari lalu ditampung ka jeman ke ka datai,” ku iya nerang sereta meri peransang ngagai semua artis patut begempung ati nyukung juluk penumbuh MRSB.
