PUTRAJAYA: Raban bansa Orang Ulu ari Ulu Baram enggau Ulu Limbang, Sarawak udah ngatur pejalai nemuai meri basa ngagai Opis Menteri Kereja Raya (KKR) lalu berandau enggau Menteri Kereja Raya, Baru Bian, ditu Hari Satu nyin tadi.
Rambau penemuai nya, Baru madahka diri temegah ati nerima penatai bala ketuai bansa asal ari Baram, Limbang, Tutoh, Magoh enggau Mulu.
“Penatai sida endang diterima enggau ati lantang lalu tu kelai basa chukup besai bala ketuai raban bansa ngagai aku empu enggau opis menteri tu.
“Sida deka berandau enggau aku pasal Jalai Besai Pan Borneo ti deka neresa tanah Adat Bansa Asal (NCR) sida,” ku Baru.
Ku iya, KKR deka beratika semua pekara ti bisi dibantai nyengkaum sebana enggau peminta peranak dia nentuka pengelantang sida diintu meruan.
Tambah mega, pekara tu endang udah nyadi fokus besai enggau komitmen iya ngelama tu, ku Baru.
“Aku dekaka hak bansa asal dijaga enggau dipebasa nitihka pematut kelimpah nentuka sida ulih diau lantang enggau likun ba menua diri empu.
“Kelimpah ari nya, aku naka ulih negika hak bansa asal kelebih agi ba tanah NCR ti patut diperati laban pengawa pemansang begunaka kerejasama rat ari sida ke ngempu tanah,” ku Baru madah nyemetak.
