KUCHING: Semua raban Perintah Penyerakup deka diperansang mansik enggau mutarka genap surat enggau petisyen ti diberi rayat Sabah enggau Sarawak ngagai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah sepemanjai 11 hari Program Kembara Kenali Borneo.
Menteri Besai, Datuk Seri Anwar Ibrahim madah, iya meri jamin deka meda sereta mansik surat enggau petisyen nya dikena mendingka sebana rayat ngagai Yang di-Pertuan Agong apin lama.
“Ba Program Kembara Kenali Borneo empai lama, Yang di-Pertuan Agong nerima basa enggau pengaga ati ari selampur rayat Borneo ti andal meda iya datai.
“Kena Hari Empat tu tadi mega, aku betemu enggau Yang di-Pertuan Agong ke alai iya chukup sinu, berandau enggau penuh pengasih sereta labuh ai mata meda penyiru enggau pengasih rayat ti dibantai rambau pejalai nya,” ku iya.
Anwar bejaku munyi nya rambau Hari Malaysia 2023 Renggat Nasional di Stadium Perpaduan Kuching, malam tadi.
Dulu ari nya, kena Hari Empat, Yang di-Pertuan Agong macha genap surat enggau petisyen ti diberi rayat Sabah enggau Sarawak ngagai iya.
Istana Negara nengah sebengkah penerang media madah, Seri Paduka Baginda udah nya nyerahka semua surat enggau petisyen tu ngagai Menteri Besai seraya meri terima kasih ngagai selampur rayat ari kededua menua tu laban udah bekunsi kisah sida nengah surat enggau petisyen nya.
