Sebana rayat Debak suntuk bekal ai diperunding

KUCHING: Perambu nyeleti Tangki Ai Beresi Debak diperunding perintah nyadi sebagi ari inisiatif dikena nangkup peminta penguna ba Debak enggau besemak dia.

Adun Saribas, Mohammad Razi Sitam perambu ngena pemansut bekal ai ari Debak endang inisiatif ke patut ngambi mutarka penanggul suntuk ai.

“Nya alai, perintah sedia berunding perambu nyeleti Tangki Ai Beresi Debak lalu nambah pemesai tangki iya nya lima juta liter sehari (5 MLD) dikena mutarka penanggul seraya nganti projek nyeleti Tangki Ai Beresi Lubau tembu.

“Bekaul perambu bukai, Opis Bekal Ai Menua Pesisir (JBALB) deka bejalaika pansik silik kelebih agi ngaga tangki ba Mangut, Tuie enggau Supa laban berundingka peminta bala penguna enggau bekal ai ke diatu,” terang Razi.

Razi mansutka jaku nya lebuh dirandau Suara Sarawak pengudah baum ba Indu Opis JBALB, ditu kemari.

Terang iya, baum enggau Direktor JBALB Datu Ir. Chang Kuet Sian mega fokus mutarka penanggul suntuk ai di Dun Saribas nyengkaum sekeda perambu enggau sebana peranak ditu.

Tu nyengkaum Kampung Bungin, Serembang, Mangut, Supa, Medang, Tuie enggau Serabang sereta rumah panjai ba sepanjai Jalai Dit/Blassau enggau rumah panjai Jerai.

Iya ngelalau JBALB patut chakah agi mutarka penanggul suntuk bekal ai ba genturung pendiau nya sekalika ba Pelilih Mit Spaoh tauka Debak kelebih agi ba sepanjai Jalai Dit enggau Suri.

“Kitai mesti berundingka sebana dibantaika rayat enggau keran mutarka penanggul ditapi sida.

“Sida ukai mantaika sebana ngapa enti pekara nya enda nanggul pengidup sida ninting hari.

“Paip udah disambung ngagai semua genturung pendiau dalam Dun Saribas nya pemujur besai tang bekal ai beresi apin disambung ngagai peranak dia,” terang iya.

Nya alai, Razi ngarapka JBALB terus berundingka chara mutarka penanggul nya ungkup timpuh panjai.

Razi mega udah mantaika isu bayar bilik ti enda setipak enggau bekal ai diterima bala penguna.

“Aku minta JBALB meresa baru laban tebal agi penguna ngaga ripot pasal bil sida kelalu besai taja sida suah napi penanggul suntuk ai,” ku Razi nyemetak madah.

Suara Sarawak