Sebana rayat: Seleti jampat jalai Kpg Kupang

SARATOK: Besai pengandal peranak Kampung Kupang ngambika jalai besai ngelawa genturung pendiau nya diseleti enggau jampat.

Gaya jalai ti nadai mayuh berubah meri pemar ngagai sida ti betengahka jalai nya kelebih agi peranak Kampung Kupang enggau sekeda rumah panjai ba sepanjai jalai nya.

Taja rayat andal amat disikap ngena sambung jalai alun ti meruan tang nyentuk sehari tu lalu nadai temu rita kemaya iya deka diseleti.

Peranak menua nya mega udah chukup sabar nganti jalai dibelakin laban nadai jalai bukai ulih ditengah nurun ke pasar besemak, Saratok tauka napatka menua bukai.

Suara Sarawak bisi nerima sebana ari peranak dia seraya ngabas gaya jalai nentuka pengamat jaku sida.

NGERUGA PENGELIKUN … Jalai ari Kampung Kupang ti apin dibelakin majak belubang ngasuh rayat sebanaka penusah ditapi sida.

Siku ari peranak ti semina deka dikelala enggau nama Latifah Mahdir madahka jalai nya nyadi jalai besai sida ti diau di Kampung Kupang enggau sekeda rumah panjai bukai.

“Baka tu mih gaya jalai ditengah kami ninting hari, majak belubang kiba kanan sereta nakung ai, enda lantang ditengah.

“Nyadi peranak ditu, aku ngarapka perintah kasihka kami lalu bejalaika inisiatif nyeleti jalai tu, enti ulih rumban pengawa melakin jalai nya.

“Suba bisi berita madahka jalai tu deka dibelakin semua tang nyentuk diatu lalu nadai temu semengat.

“Jalai tu endang patut diseleti, mayuh lubang besai sereta dalam lalu enti ujan jalai deka nakung ai tu tau ngeruga pengelikun kami ti nengah jalai tu,” ku iya mantaika sebana diri.

Jalai besai ngelawa Kampung Kupang urung 20 kilometer aja ari Simpang Bajau, Jalai Besai Saratok-Betong. Taja pia, dipelaba setengan ari jalai nya udah dibelakin.

Ba penemu Ramli Duat, gaya jalai ti mayuh belubang mega ngasuh jam mayuh tebasau laban jam pejalai panjai agi.

“Kami enda ulih laju laban bejimat deriba kelebih agi enti entukar baruh nangika lubang dalam ti enda ditemu penalam laban nakung ai.

“Udah teleba ngasaika sejam pengelama napatka Simpang Bajau taja takah semina 20 kilometer aja.

“Nya kebuah kami peranak Kampung Kupang enggau sekeda peranak rumah panjai ditu minta kasih enggau ati sinu piak menggi tanggungpengawa berunding enggau beratika pekara tu enggau jampat.

“Kami pechaya perintah ti bisi diatu chukup siruka peminta enggau peneka rayat kelebih agi ba pengawa nyendiaka penyikap perengka guna pemun baka sambung jalai ti meruan,” ku iya minta peminta sida dipending.

“Bantu kami lalu pendingka sebana ti seruran nyukung perintah ngelama tu,” ku iya ngapil.

Berita ngerimbas pending bisi madah barang sapa deka gawaka pengawa nyeleti jalai tu nyangka bisi pengelebih ba pengawa bepiluh deka datai.