Sebana sekut ba Palan Penyangkai Kapal Senari deka diperesa

KUCHING: Menteri Infrastruktur enggau Pemansang Penyangkai Kapal Tan Sri Datuk Amar (Dr) James Jemut Masing deka meresa palan Penyangkai Kapal Senari di Jalai Bako seharitu laban meda nama penanggul ti nyadi dia.

Iya madahka deka ngabas pengirau ati ti dipadahka Gerempung Kapal Sarawak laban sekut ti enda ngetu ba Palan Penyangkai Kapal Senari ngujungka pengawa nganjung kontena ngagai pengimport bisi tejanggal.

“Aku deka meresa Palan Penyangkai Kapal Senari ila (sehari tu) dikena ngiga nama penanggul ti nyadi,” ku iya lebuh dirandau, kemari.

Masing ti mega Sapit Kepala Menteri madahka enda ulih ngelansa dalam pasal pekara nya nyentukka iya empu nemu penanggul ke amai nyadi.

Kena 17 April tu tadi, Chairman Gerempung Kapal Sarawak David Chung madahka raban pengangkut nganti gintir bejam-jam dikena ngambi kontena ba Palan Penyangkai Kapal Senari lebuh deka nganjung barang ngagai pengimport.

Ku iya, pekara nya dipelaba bepun ari penanggul komputer ba palan penyangkai kapal nya ngujungka operasyen sida lubah.

“Kami ngarapka raban bekaul ulih mutarka tauka nambahka sistem ti lebih manah awakka pekara nya enda nyadi agi,” ku iya.

Kena 13 April, Kaunsil Palan Penyangkai Kapal Kuching (KPA) madahka penanggul komputer udah nyadi ba Palan Penyangkai Kapal Senari kena 27 March ke udah lalu laban ai tama ngagai alur kuasa karan bilik komputer ngujungka karan bisi sut.

Berindik ari nya, KPA ngambi jalai alternatif dikena neruska servis, iya nya nyampur prosedur manual nengah aplikasyen dalam tali arus.

Nya alai, KPA kena 29 March bejalaika prosedur alternatif tu nyampur prosedur manual enggau aplikasyen dalam tali arus ba Palan Penyangkai Kapal Pending.

Suara Sarawak