Sebuah bot enggau tungkang ditan raban Maritim

TANJUNG MANIS: Ejensi penerit Adat Maritim Malaysia (Maritim Malaysia), Zon Maritim Tanjung Manis mujur ngetan sebuah bot enggau tungkang ke benung mansa Pas Chop Pengkalan, kena Hari Enam tu tadi.

Direktor Zon Maritim Tanjung Manis, Komander Maritim Mohd Ariz Md Kassim madah, maya diperesa bot nya sarat ngundan batu mit urung 3,500 tan metrik dipelaba dibai ari Kuching nuju ke Sibu.

Ku iya, bot nya ditan maya Ops Permai dipejalai ba kandang tasik Belawai kira 0.9 batu nautika tenggara Tanjung Jerijeh, urung pukul 4.30 lemai.

“Pengudah diperesa tetemuka sida tu puntan mantaika sebarang dokumen Pas Chop Pengkalan maya ti belayar. Semua kru ke ditan nya nyengkaum dua lelaki peranak menua enggau empat lelaki peranak India beumur urung 20 ngagai 65 taun enggau bisi dokumen pengelala ke sah.

“Bot tunda, barge enggau kru nya dibai ngagai Pengkalan HSL Tanjung Manis ngambika dipansik silik. Kes deka dipansik nitihka Seksyen 37 (1) Akta Kastam 1967 laban puntan mantaika dokumen Pas Chop Pengkalan maya belayar,” ku iya madah nengah sebengkah penerang kemari.

Beduduk ari nya, iya minta raban maritim (industri kapal enggau orang berikan seruran ngemeratka pengelikun maya ba tasik lalu mesti ngena jaket pengelikun.

“Mensia mayuh mega dipinta betelefon terus nuju Palan Operasyen Zon Maritim Tanjung Manis nyema bisi penusah emejensi tauka pengawa nyelai dipeda terus madah ngena lumur 084-613292, Palan Operasyen Maritim Nengeri Sarawak ba lumur 082-432544 tauka MERS 999, ” ku iya.

Suara Sarawak