Sebuah feri ditambah ba Penyangkai Feri Sebuyau Triso

SEBUYAU: Perintah Nengeri Sarawak ngemendarka sebuah feri tambah ti ulih ngundan 32 buah entukar ke alai diatu feri bisi tiga buah ba Penyangkai Feri Sebuyau Triso.

Menteri Muda Jalai Tebing Tasik ke mega Adun Sebuyau, Datuk Julaihi Narawi madah, penyampau feri ditambah dikena nangkup penyampau entukar ti majak nambah bekenaka servis feri Sebuyau Triso pada suku Ke-4 2018, pengudah dua jematan di Bagi Menua Samarahan tembu, iya nya Jematan Batang Sadong di Kampung Sungai Buloh enggau Jematan Samarahan.

“Perintah Nengeri udah melanja RM48 juta (2017) enggau RM51 juta (2018) dikena nampung subsidi nentuka servis feri meruan bisi.

“Nitihka statistik ari Opis Kereja Raya Sarawak, sepenyampau 31,331 buah entukar dirikod dalam bulan Oktober 2018, nambah ngagai 33,427 dalam buan November 2018 lalu udah nya 43,933 dirikod Disember 2018, bekenaka servis feri nya.

NGABAS… Datuk Julaihi Narawi disempulang bala bukai bejalai ngabas taba Penyangkai Feri Sebuyau Triso. – Gambar Marvin Kudang.

“Operasyen feri ketiga tu ulih ngemandakka jam nganti maya jam jalai sekut kelebih agi ujung minggu, musim hari besai enggau kemisi sekula ari 4 jam setengah ngagai 2 jam aja,” ku iya lebuh bejadika Licha Penerang Pengelikun Operasyen Feri Begulau Enggau Komuniti Menua Nya di Balai Pemansang Sebuyau dientudi pengawa bejalai ngabas taba ke Penyangkai Feri Sebuyau Triso.

Ku iya, sida ti betengahka jalai alun ngena servis feri di selampur Sarawak dilalau seruran nitihka atur pengelikun feri sereta meri kerejasama enda ngelih gintir enggau nitihka gerah bala krew feri ti gawa kelebih agi maya entukar tama enggau pansut ari feri.

“Semina deriba aja dikemendar duduk dalam entukar enggau cheremin dibuka magang seraya bala bukai ditagang duduk dalam entukar maya feri bekejang.

“Injin entukar meseti dipadam lalu brek jari dibatak amat maya dalam feri. Penguna mega dilalay seruran nemu dini alai kereban bantu penusah ngenyit baka jaket pengelikun enggau pelepuk,” ku iya nentuka sida ke datai sehari nya ngelala pun pekara ti tau ngasuh penusah nyadi di feri.

Iya mega minta kerejasama ari raban berikan menua nya ari sitak Sebuyau enda ngetan pukat besemak pejalai feri laban dikenangi deka ngachau operasyen feri.

JALAI PENYAMBUNG… Gaya pejalai Feri Sebuyau/Triso ba Penyangkai Feri Sebuyau Triso ti ngundan motosikal enggau entukar besai bukai.

Suara Sarawak