Sebuah rumah ba Kpg Batang Maro angus tengah malam tadi

KABONG: Tujuh iku diri sebilik lenyau palan endur ngenduh pengudah sebuah rumah ke alai sida diau angus lengis ba penusah ke nyadi ba Kampung Batang Maro, ditu malam tadi.

Lapan iku kaban Bomba betapi enggau pemar ngerara api ke benung nganguska sebuah rumah ditu ketegal jalai ti kelalu mit.

Komander Operasyen,PPgB Nazry Mohamat madahka sida berumban ngesah palan penusah pengudah nerima panggil ari mensia mayuh bekaul enggau penusah nya urung pukul 12.00 tengah malam.

“Lebuh datai ba palan penusah, PBK II Yusof Bin Tamin amat bisi tepedaka sebuah rumah kayu benung angus.

“Operasyen nguji ngerara api balat mar laban kereban pengangkut dikena ngerara api enda ulih tama semak palan penusah ketegal jalai kelalu mit.

“Api mujur dirara lengis urung pukul 1.45 pagi lalu operasyen tembu pukul 3.45 pagi,”ku iya madah nengah sebengkah penerang.

Nadai penusah bebadi nyawa diripot ketegal penusah tu lalu kebuah penusah nyadi sereta penyampau pengerugi benung dipansik.

Suara Sarawak