DEBAK: Injin parti ba semua renggat patut nganggap PRN-12 deka diatur pagila awakka semampai sedia ba tikas ke pemadu tinggi.
Kaban Parlimen Kota Samarahan ke mega Chairman Sarawak Kita Empun (SKE) Rubiah Wang madah, taja kitai bedau nemu kemaya haribulan ke amat, tang pekara nyata PRN-12 deka diatur enda lama agi.
“Nya alai, Supreme Kaunsil Komiti Indu PBB diatu majak regas betemu enggau rayat dikena nentuka injin PBB lebih agi orang indu seruran besedia, anggap aja PRN-12 diatur pagila.
“Laban, PRN-12 nyadi pengawa bepilih keterubah Datuk Patinggi Abang Johari Tun Openg nyadi Kepala Menteri enggau Chairman GPS…nyadi nya pemadu beguna.
“Keterubah endur kitai meri mandat ngagai iya sekali agi nyadi kepala menteri enggau kedua, PRN tu kitai nguna lambang baru.
“Nya alai, kitai deka nentuka lambang BN tauka dachin nadai agi ngeregau rayat. Buai BN ba pala enggau pikir kita, ingat nadai agi pekayan biru, tang pekayan mirah burak iya nya GPS,” ku iya rambau program SKE Renggat Dun Saribas di Dewan Perpaduan, tadi.
Ku iya , rayat nengeri tu patut terus mandangka ngagai Malaysia iya nya Sarawak deka terus mansang dibaruh GPS.
Rubiah ngasaika SKE ukai semina nyadi pelasar dikena negapka injin parti, tang mega nyadi pelasar ungkup peransang.
“Aku andal mayuh pemerani injin mirah burak deka lebih tegap lalu seruran sedia ngatur strategi enggau program ngaul pengundi.
“Aku ngarap SKE tu ulih mantu chalun Saribas ila menang ba penuduk enggau lebih besai lalu nentuka Saribas mengkang dipegai GPS enggau PBB.
“Nya alai, aram anang nganti agi, anang malik ke belakang agi. Juluk kitai meri GPS menang ba Dun Saribas,” ku iya.
Iya berebak enggau nya nangkan komiti parti neleba diri bekimpin ngena teknologi baru.
