KUCHING: Sarawak beguna ke hotel enggau palan aum tambah dikena nangkup aum besai enggau ngasi agi.
Menteri Dagang Temuai, Industri Kreatif enggau Seni Pemerindang ti mega Menteri Nembiak, Lumba enggau Pemansang Pedagang, Datuk Seri Abdul Karim Rahman Hamzah madah, enti nadai fasiliti menyana, inisiatif dikena ngelaku Sarawak nadai reti.
“Nadai guna kitai ngaga pengawa ngelaku ba serata dunya dikena mai tama aum besai kitu enti kitai nadai ngembuan infrastruktur ti menyana.
“Enti palan aum semina ulih nampung 4,000 nyentuk 5,000 orang aja, kitai deka napi penanggul mai tama program besai ti ngelui ari penyampau tu,” ku iya.
Karim mansutka jaku nya rambau Program Anugerah Anak Sarawak Ke-10 ti diatur Business Event Sarawak (BESarawak) lalu dipenyadi Premier Sarawak, Datuk Patinggi Tan Sri Abang Johari Tun Openg ba sebuah hotel, ditu malam kemari.
Nya alai ku iya, perambu Abang Johari numbuh sebuah agi palan aum ba Kuching ngelai penyakah perintah nangkup peminta ti majak nambah ba industri dagang.
Ku iya, pengawa meranakka puku ba infrastruktur menyana deka nambahka tikas semekih Sarawak nyadi palan rentayan program antarabansa ti besai agi.
