ARTIKEL

Sedia nujah andau penguji

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Ulih: Roselind Kembang Sulai

TUSUN 97

“UNTAK jai!” Iya ngejuka pala aku.

“Nuan nya pama agi gila lelaki.”

“Nuan amat berani ngelaban jaku Tr. Duat?” Aku nanya iya.

“Berani.”

“Aku enda berani ngelaban apai aku.”

“Enti baka nya pagila apai indai nuan kitu meh?”

“Nganti aku bejaku enggau apai indai nuan.”

“Ba pulai.”

“Takut aku bejaku ba mua apai nuan.

Enda tepansutka jaku kini aku. Ba telefon ulih.”

“Bejaku ba telefon ga nuan.

Nurun ke tengah laman, ke ujung bilik, sebelah langkau manuk enggau babi orang, dia meh nuan mukul telefon ngagai apai.”

Hah! Ngasuh ketawa tang iya enda ketawa.

“Kati ti Aric nitihka aku pulai?”

“Anang madahka iya.”

“Ku nuan iya enda ulih nemu?

Nama enggai nyadi iya ngiga aku betanya ba apai indai aku?

Kada enda udah minta lumur Sati iya deh?”

Jauh runding aku tu.

Jauh ke mua.

“Pulai tua, au.

Nuan enggau aku pulai lemai lagi.

Aku meli tikit online diatu.”

“Duit chukup?

Aku bisi duit.”

Aku ngiga duit dalam beg sandik.

“Nyah …” Aku nyuaka segulung duit.

Duit seratus-seratus.

Dipeda ari penebal, lebih seribu pelaba aku.

“Dini nuan bulih duit ngemayuh tu?”

Iya tekenyit.

“Beri Aric.”

“Sua pulai!” Nyau ngasuh urat rekung iya bebandir.

Enda nyadi meh aku nyuaka iya duit nya.

Gulung duit disegulka baru ke dalam beg.

“Ka sium?”

Penyegit datai baru.

“Enggai.

Pulai ke rumah ti deka besium,” ku iya.

Kahkahkah … Geledi ati ninga.

“Kuyu nuan aja ku aku,” aku ngemetulka runding iya.

“Kuyu enggai. Aku badu nyium nuan nya.

Jegit. Kanji.

Minta sium aku. Minta sium apek Aric …” Ku iya.

“Nadai minta sium Aric nya aku tu …” Aku ngenggai dikempiaka iya.

“Berapa kali Aric udah nyium nuan?”

“Iya enda baka nuan.

Nadai iya nachak-nachak aku baka nuan.

Mulut banggur pan agi meh deka nyium orang.

Aric enda kala negu mulut aku,” ku aku.

“Kuyu nuan deh?

Berapa kali iya udah nyium kuyu nuan?”

Iya nukik aku.

“Ukai nya nemu ambis.

Kuyu Ayung enda nemu ngelempis taja mayuh orang nyium,” aku nguji ngelamun pengamat.

“Suah meh udah ti pia …”

“Nadai!” Aku ngendit kaki kiba iya.

Ngerising iya ngenatka abi endit aku.

“Nurun. Laun lagi!” Aku muka pintu. Iya entudi aku pansut ari bilik nya.

“Pira …” Iya narit buk aku.

“Aku ka ngasuh orang nupi nuan ngirup udah tu.

Enti nuan mabuk, aku ka nukik nuan, ngambi nuan nusi berapa kali Aric udah nyium nuan.”

Peiii … Sengapa udu runding nembiak nya.

Nyau ngasuh mata aku bekuring.

Kaki nyingkang senyingkang nyau datai ba lif.

“Iya kumbai nuan baka nuan?

Iya mereti.

Nuan ke enda mereti …” Ku aku.

Nengil.

“Telefon ngagai iya nuan, alai.

Tipu.

Aku ka seretai nuan nurun ke fakulti pagi tu,” nemu ngasuh orang nipu.

“Lagi aku telefon.

Nganti dah datai ba buding.”

“Diatu. Aku ka ninga.” Piii … Nyau kena iya bemain-main.

Ta enda ngasaika diri udu ngerembang madang emperingat.

Nadai aku deka diasuh iya telefon tekala nya.

Aku pan agi ngiga kedalih.

Sepemanjai jalai pulai, mua iya tampak.

Iya masang radio Hitz FM.

DJ kekuchah masang lagu ribai ranchak.

Gaga meh iya nya.

Ninga aku deka dibai iya pulai. Anang aja mua hari bebali baru. Sepengudah nemu saut ari Aric.

Datai ba buding, aku dulu telefon ngagai Aric.

Udah regas amat sura nyawa iya pagi tu.

Tekenyit aku ninga iya nyebut iya baru deka nurun ari rumah laban deka nganjung aku ke fakulti.

Enda ibuh ku aku, kaban Lia nyangkaika aku lagi.

No,no, no … ku iya. Malam tadi udah enggau Lia, pagi tu gintir aku.

Aku nurun tu. Uwaa … Aku ninga munyi enjin entuka diidupka.

“Igat … Iya udah nurun Igat …”

“Emmm ….”

“Enda nyadi, au.”

“Emmm …”

“Sorry, au.”

“Emmm …”

“Bye …”

“Emmm …”

Emmm memagang.

Tang enda lama udah nya iya nganjung siti gambar.

Tikit bilun aku.

Meleka pukul tiga ari KLIA.

Anchi pemama iya.

Enda iya ngira pemalu ti disan pulai ke rumah.

Pemalu ti meransang ati asai deka ngena kerubung mua.

“Hi, good morning. So, do you feel better this morning?”

Aric nganti aku ba luar kerita. Iya mukaka aku pintu.

Suba aku rindu meda iya.

Tuchum enggau jaku sapa nya ngerinduka ati aku suba.

Seksi amat gamal iya dibai buk basah-basah.

Tubuh tegap, tinggi nyaguka penyigat iya.

Kini ke penunga pengagit ati lebuh meda iya?

Tabar amat asai beperening enggau iya pagi tu.

Camry meleka ari pelaman Blok A.

Enda ranjur ke FPend tang ngetu tisi jalai.

Iya nyengkau kambut di belakang.



“Nasi Lemak,” ku iya.

“Siti kerang lalu siti da dagin.

Jengkau aja siti, udah setengah diempa, lagi tua betukar baka sehari nya …”

Akaaiii … Pementas nya mangka ati aku baka nitar malam kudi.

Aku nyengkau tungkus asi ti ari baruh.

Kerang. Iya ketawa.

Sigi kerang ungkup nuan haa ku iya.

Aku makai asi nya enggau asai enda lantang.

Enda lantang laban ngayahka iya.

“Aric, i am sorry …”

“Hmm?” Iya ti benung nyuap asi ngena siduk malik ngagai aku.

I am sorry.”

Why?”

Ah, asai deka neritik ai mata tumu pagi tu.

Aku enda nyaut iya.

Udah bagi dua diempa, aku nyuaka tungkus asi aku ngagai iya.

Besilih.

“Peremisi seminggu nuan pulai ke Ipoh.

Indai dah meli tikit ke apai duai indai nuan.

Enti ulih bala madi nuan bai memagang tang sida besekula.

Ayung aja enggau.”

Ouw … Lemi tulang ninga.

“Pulai ari kelas lagi, nuan pulai ke rumah kia.

Pulai ke buding ngambi barang aja.”

Baka ni ke tikit aku deh?

Aku enggai madahka iya ba mua iya.

Enggai bekelikuh ba mua.

Aku takut alah laban pengasih aku ke iya.

Kasihka iya diayahka indu kedua kali.

“Pengerami nya digaga ba rumah aja.

Orang magang ngadu.

Indai benung kiruh ngiga orang.

Hari Enam minggu baru tua betunang.”

Apuu … Nyawa nyau enggai makai ninga nya.

Asi lemak ke nyamai nya enda ulih ditembuka aku.

Ati asai deka meretih.

“Aric, aku enggai betunang baka nya.

Nuan ngaga pengawa enda nanya aku belama.

Ngangauka orang ngemayuh nya.

Ngayahka duit. Ila ti enda jadi, ngemalu diri aja. Enda ibuh rami baka nya.

Aku enda datai.

Nuan aja meh betunang. Enda datai aku tu.”

Gidan. Tungkus asi ditikupka aku.

Dibuai ke dalam plastik. Aric tebelenga.

“Aku enda datai a.

Kinsil magang pengawa ke udah diperambu kita nya.

Lemai lagi anang ngiga aku.

Aku rari.

Aku ringat ngagai nuan laban enda kala mendingka jaku aku.”

Sweetheart?” Iya agi tebelenga.

“Anjung aku ke fakulti,” ku aku.

“Anang ngaga aku baka tu …” Ku iya.

“Anjung aku ke fakulti.”

Meda penemil aku, iya nyimpan tungkus asi ke dalam plastik mega.

Kerita nuju Fakulti Bahasa.

“Pengerami nya sigi dipejalaika baka ke udah diperambu.

Nuan mesti datai,” iya mantaika penemil iya mega maya aku deka pansut.

“Anang ngiga aku lemai lagi.

Aku rari.”

“Hari Enam minggu baru tua betunang.”

“Aku enda datai.

Nuan nemu ati aku ba sapa.”

I know what you did but … I don’t care. You’re mine now.”

We just a friend. A very close friend.”

I’m in love with you, my friend.”

Stubborn!” Udah jari iya, aku pidat.

“Aku enda datai!” Aku enggai alah.

“Gaga aja ngambi kita sebilik malu.”

Udah nyebut nya, nyau aku tetabun.

Pama udu.

Mejal orang aja-aja.

Ukai sida kala nupi aku ari mit.

Nadai utang enggau sida iya aku tu.

Tang anak orang siku da gaga amat.

Tuchum-tuchum meda aku ari jauh.

“Aku ka nabanka nuan tengah hari lagi.

Brian nganjung tua.

Pulai ari fakulti, ngambi barang nuan dulu, udah nya terus mupuk.

Barang aku udah dibai aku tadi.

Nadai utai dibai aku tu.

Siti beg ma belakang aja.

Kotex enda ibuh bai.

Ngenyekutka beg nuan.

Meli ba kantin dulu.

Bisi dijual din peda aku suba …” Gamal baka ke enda nyebut utai memacham.

“Nuan ka tampar?” Ati ku pedis ninga Kotex. Bejaku enggai enda mangki Kotex.

“Ukai nuan pulai laban deka nyium aku?” Piii … Gelam enggau. Enti ringat baka nama.

“Uji nyabak nei …” Aku enggai alah dikemelika iya.

“Lagi tua nyabak ba mua apai, au.”

Nyau ngasuh iya nyadi gi.

Malam lagi ku ka meda ulah iya udah datai di rumah.

Bisi ga Petara ngemata.

Licha Kursus Asas Perguruan pukul 10 ngagai 12, dilanjar ngagai siti awak udah peremisi seminggu ila ketegal Pengelicha bisi penusah ba jalai alun.

Aku beradu jejampat. Amat Brian nganjung.

Betaban rari ku aku maya Lia nanya.

“Oh, aku ke lelak ditanya Aric laban nuan nya.

Ngaga hal enggai enda malit aku,” Lia muchau.

Terebai.

Kami duai Igat terebai nabanka pengerinduka ngagai pangan diri pulai ke menua.

Besedia aja meh napi jaku enggau perening mata orang.

Berani nebang, berani meh ngesan. Kenu. Kada enda surut deh.

BERITA LAIN

BERITA TERBARU

‘Strongman Challenge’ tarik minat orang awam

KUCHING: Penganjuran pertandingan ‘Strongman Challenge’ dapat menggalakkan gaya hidup sihat dan minda yang kuat dalam kalangan anggota polis serta orang awam. Komandan Pulapol Kuching, SAC