MIRI: Semua tuai raban bansa patut nyedia profil rumah panjai sida ngambi perintah ulih ngelala isu ti ditapi sereta meri bantu ti lebih engkeman.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madah, profil nya meseti diisi enggau demografik peranak nyengkaum sejarah pelajar sereta pengawa tiap peranak.
“Tu beguna kelebih agi ngambi ke pengari rayat nemu penanggul ba sitak diri empu, ambi ke chunto isu kurang bekal kuasa karan, ai tauka telekomunikasyen.
“Profil tu enda tau enda disedia sereta dipinta opis pelilih ngambi ke kitai ulih mantu mutar pengurang ti ditapi,” ku iya. Penguang bejaku munyi nya lebuh bejadi pengawa nutup Aum Besai Dua Taun Sekali Gerempung Berawan Sarawak ditu ensanus.
Bekaul pengawa nya, iya ke mega Kaban Kunsil Nengeri (Adun) Marudi madah bansa Berawan patut bisi pengari ke dipadu nyadi pemancha tauka temenggong laban bansa nya bisi penyampau peranak ke ngelui 20,000 orang di Baram.
“Bepelasarka malin ti udah ditetap perintah, genap bagi menua bisi temenggong nitih ke bansa enti sema penyampau peranak ngelui 10,000 orang.
“Genap pelilih mega patut milih siku pemancha enti sema peranak dia mega ngelui 10,000 orang.
“Nyadi tu bepanggai ba Tuai Raban Bansa Berawan diatu nganjung sekeda nama ngambi ke ulih ditisih,” ku iya agi.
Ba aum besai nya, Markus Abdon Ajang dipilih nyadi Presiden Gerempung Berawan Sarawak ungkup sesyen 2023 ngagai 2025 seraya Edward Laing Epoi dipadu mangku pengawa Mandal Presiden.
Sama ngulu aum nya Ex-Presiden Gerempung Berawan Sarawak, Datin Catherine Awing sereta raban Penyanding Penemu Presiden Gerempung Berawan, Penghulu Patrick Jelaman, Kaunselor Gary Hassim enggau Herbert Lawai. – EDISI UKAS
