SRI AMAN: Peranak genturung pendiau Sri Jaya Park ditu sebana sereta asa ati meda pengamah uras ti kelalu mayuh lalu ngachir sengapa endur.
Kenu ku siku peranak menua nya ti enggai dikelala nama madahka pekara nya sigi udah lama nyadi lalu enda ngelantang ati sida ke sama diau ba genturung pendiau nya.
Ku iya, penanggul tu ukai seratus peratus salah sida Kaunsil Mengeri Sri Aman (MPSA) laban sida sigi bisi bejalaika tanggung pengawa sida enggau manah.
“Naka tu, sida MPSA bejalaika tanggungpengawa sida ngambi uras ditu penyuah empat tauka lima kali dalam seminggu.
“Tang tu dipelabaka bepun ari penanggul enda chukup palan ke disedia endur muai uras ngujungka palan nya jampat penuh, ngelumpa sereta ngachir ngapa.
“Palan muai uras tu kebendar sigi ungkup kami ti diau ba Sri Jaya Park ditu aja tang sida ti ari genturung pendiau bukai baka ari Taman Desa Indah, Taman Brayun sereta ari kilang mega bela nganjung uras kitu,” ku penerang peranak Sri Jaya Park nya.
Siku agi peranak menua nya bela enggai dikelala nama madahka suba sida MPSA bisi nyendiaka dua iti tung uras besi ti besai ba endur nya tang diatu udah diambik sida pulai baru. Bepun ari nya bala mayuh enda ngetu bebuaika uras dia.
Iya mega madahka ukui udu nyerungkai uras ba endur nya ngujungka uras balat ngachir ke bukai.
Kenu ku iya mega, lebuh maya musim panas, peranak menua Sri Jaya Park berasai enda lantang tesirutka bau but ari tugung uras nya.
“Nya alai, kami ba Sri Jaya Park arapka raban bekaul lebih agi raban MPSA beratika pekara tu sereta nyendiaka mayuh agi tung uras besai ba Taman Desa Indah, Taman Brayun dikena mutarka penanggul tu,” ku iya.
