Segerit nadai chukai dirampas kastam

KUCHING: Opis Kastam DiRaja Malaysia (JKDM) Sarawak mujur ngemuntan aktiviti mai segerit chara belalai ke enda dikemendar kastam berega RM82,236 ba sebuah begunan puang semak Jalai Penrissen, Hari Minggu tu tadi.

Direktor Kastam Sarawak, Datuk Sharifah Halimah Tuanku Taha madahka operasyen tu dipejalai raban Unit Operasyen Darat Indu Opis Kuching ba endur nya.

“Lebuh meresa kedai nya, kami tetemuka 0.98 juta batang segerit mayuh bansa dipechaya enda dikemendar Kastam.

“Semua barang nya dirampas enggau semua segerit ti dirampas nyengkaum chukai nya berega RM655,887.60,” ku iya meri penerang, ditu ensanus.

Nambahka nya ku iya, barang dirampas dibai ngagai Stor Penerit Adat Kuching ngambi disimpan enggau dipansik silik.

Sharifah mega madahka segerit nya dipelaba deka dijual ba makit menua ditu.

Iya mega madahka kes diatu dipansik di baruh Seksyen 135(1)(d) Akta Kastam 1967 enggau enti ditemu salah, saspek ulih diukum RM500,000 nitihka penyampau ke besai agi tauka dijil enda ngelui ari lima taun,” terang iya silik agi.