KUCHING: Penanyi tebilang Iban, Gabriel Fairuz Louis mujur diberi pengandal ati ari Perintah Sarawak nengkebang enggau nyadaka lagu Segulai Sejalai ti mai reti ‘Seiring Sejalan’.
Iya madah, lagu nya deka nyadi lagu tema Hari Malaysia 2023 ti deka diintu kena 16 September tu.
“Terima kasih ngagai Perintah Sarawak laban udah ngelempai pengandal ati ngagai aku, Mal Imran enggau Valerie Thiam nyadaka lagu tu.
“Tu siti basa ti besai ngagai kami sebuat lalu kami udah ngaga pemadu manah rambau ngerikod enggau nyadaka lagu tu.
“Dipelaba aku, lagu tu udah berengkah diputar ba churung radio lalu deka dilanchar rasmi kena 16 September tu (pagila).
Iya ti mega Pegawai Main Asal ba Opis Main Asal enggau Seni Sarawak madah, lagu Segulai Sejalai nya ngundan pesan penyerakup.
Ungkup penerang, rambai jaku Segulai Sejalai nya endang dipilih Menteri Besai Ke-10, Datuk Seri Anwar Ibrahim rambau ngintu Hari Gawai Renggat Nengeri Sarawak ba baruh Perintah MADANI.
Tandu Gabriel, lagu nya mai pesan penyerakup lalu Anwar udah bechunto ke penyelai penyerakup pupu bansa ba Sarawak.
